Afundación presentará «Castelao grafista (facsímile)» en Rianxo, a vila natal do insigne intelectual galego
Afundación, a Obra Social de ABANCA, veu homenaxeando desde o ano 2020 o insigne intelectual e político rianxeiro coa mostra «Castelao grafista (facsímile)», conformada por fondos procedentes das coleccións ABANCA e Afundación, producida pola Fundación Torrente Ballester e incluída no programa «Corrente cultural», desenvolvida en colaboración con ABANCA e os diferentes concellos galegos.
Tras os diferentes eventos celebrados ao longo de 2025, «Ano Castelao», esta mostra, unha das máis visitadas de Afundación, chega a Rianxo, vila natal de Alfonso Daniel Rodríguez Castelao, co propósito de dar continuidade á homenaxe a un home imprescindible na cultura e política galegas do século XX cadrando coa conmemoración do 140 aniversario do seu nacemento. O seu legado, tanto narrativo, como ensaístico, investigador, político, pictórico ou grafista, constitúe un dos máis relevantes do sistema galego. Coa presentación desta exposición de Afundación en Rianxo, búscase seguir promovendo o coñecemento e o estudo dun home e dun tempo decisivos para o devir da Galicia contemporánea.
As imaxes de parte da obra exposta están dispoñibles aquí.
A inauguración, en presentación a medios, terá lugar o vindeiro mércores, 4 de marzo, ás 13.00 h, no Centro Sociocultural Auditorio de Rianxo, e contará coa presenza do alcalde, Julián Bustelo Abuín; o coordinador institucional de ABANCA na provincia da Coruña, José Manuel Vilariño Orgeira; a directora da oficina de ABANCA en Rianxo, Paula Outeiral Martínez; e a coordinadora adxunta da área de Cultura de Afundación, Paloma Vela Garicano.
A exposición permanecerá aberta ata o 1 de abril na sala de exposicións do propio centro sociocultural, en horario os luns de 10.00 a 14.00 h, e de martes a sábado de 11.00 a 13.00 e de 17. 00 a 20.00 h.
Como complemento a esta mostra, e co obxectivo de promover a educación e o coñecemento a través da cultura, a Obra Social de ABANCA desenvolveu un exhaustivo e atractivo programa didáctico deseñado para o alumnado a partir de 4.º de primaria asentado en dúas partes: unha visita comentada e unha proposta artística e de STEAM no obradoiro.
Enmarcada tamén na iniciativa «Cultura por alimentos» que Afundación leva a cabo en colaboración con FESBAL (Federación Española de Banco de Alimentos) e que pretende achegar alimentos de primeira necesidade aos bancos de alimentos locais, a entidade invita aos visitantes a colaborar con esta iniciativa a través da doazón de alimentos non perecedoiros ao visitar esta exposición.
«Castelao grafista (facsímile)»
A mostra, que conta coa facsímiles de pezas procedentes das coleccións de arte de ABANCA e Afundación así como doutras coleccións privadas e públicas, componse dunha escolma rigorosa de obras nas que se reflicte a evolución tanto do compromiso ético, social e político do artista rianxeiro, como dos seus recursos plásticos e a súa querenza pola ilustración. O seu interese pola palabra e pola imaxe consolidouse nas colaboracións que, a partir de 1924, empezou a publicar en medios como Galicia, Faro de Vigo ou Vida Gallega, nas que a ilustración e o texto reflicten a ácida crítica dun Castelao cada vez máis comprometido. Esta forma de arte e denuncia acabaría articulando obras tan relevantes como Cousas da vida (1930) e os álbums de guerra Galicia mártir (1937), Atila en Galicia (1937) e Milicianos (1938).
A mostra reúne facsímiles da Colección de Arte Afundación e debuxos do álbum Cousas da vida de Castelao, dos que pertencen á Colección de Arte ABANCA. Ademais, poderanse ver retratos fotográficos, caricaturas, debuxos e portadas de revistas.