Afundación presenta «Non deixes que se apague a túa creatividade» na Sede de Pontevedra e en Afundación TV

Finalista dos Premios EDUCA ABANCA 2021, Patricia García, docente e pedagoga da Academia Trazos, converteuse nun referente na educación creativa, diferencial e con atención á diversidade. Afundación presenta mañá, 17 de novembro, unha nova conferencia para escolares de cuarto e sexto de educación primaria e primeiro de ESO, dentro do ciclo «Educación século XXI». Estará en directo, ás 11.30 h, na Sede Afundación de Pontevedra o e tamén en streaming a través de Afundación TV.

«Hai anos pregunteime: por onde empezo?, que necesitan?, que necesito?… Despois de moito pensar e de equivocarme, decidín ser fiel a min mesma e comecei a usar a creatividade como medio de aprendizaxe. Levo anos defendendo a necesidade de promover a creatividade dentro das aulas, e que os nosos nenos e nenas se beneficien desta forma de aprender e, evidentemente, poñéndoo en práctica co meu alumnado».

Segundo a definición máis habitual, a creatividade é a capacidade de creación. Refírese á posibilidade de innovar con orixinais ideas ou conceptos. Orixinalidade, inventiva e innovación. A creatividade é íntima amiga da imaxinación, trátase de xerar algo novo. Pero para todo isto debemos ofrecerlle aos nosos nenos e nenas a oportunidade de facelo, darlle tempo e espazo real para imaxinar.

Neste encontro poñerase o foco nos nenos e as nenas, compartindo unha maneira diferente de entender a aprendizaxe, estimulando o seu pensamento creativo dándolles voz, escoitando as súas propostas e opinións sen facer prexuízos ou poñer límites.

Patricia García Figueroa, mestra, psicopedagoga e defensora da creatividade

Emprendeu o seu fogar educativo hai nove anos en Redondela. O que comezou sendo un pequeno espazo de aprendizaxe, é actualmente o seu motor de vida, o seu lugar onde compartir o seu modo de entender a educación e un medio para contaxiar a rapazada e as súas familias de maxia e fantasía.

Día a día pon o seu gran de area para axudar no rendemento e dificultades académicas dos seus alumnos e alumnas, achegando nas súas clases pensamento creativo e desenvolvendo proxectos temáticos baixo escenarios e decorados, usando como medio de creación a reciclaxe. A súa misión é crear estudantes con criterio propio, con capacidade de reflexión, decisión, eliminando prexuízos e desenvolvendo un pensamento fluído e flexible, mostrándose ela mesma como modelo de orixinalidade, compromiso, constancia e esforzo.