Afundación, ABANCA e o Concello de Monterroso inauguran «Castelao grafista (facsímile)»
O Concello de Monterroso, ABANCA e Afundación, a Obra Social de ABANCA, inauguraron a mostra «Castelao grafista (facsímile)». Ao acto asistiron Eloy Pérez Sindín, alcalde de Monterroso; Carlos Teijeiro Pita, coordinador institucional de ABANCA en Lugo; o director da oficina de ABANCA en Monterroso, José María Gayoso García; e Beatriz Fernández-Anguiano, coordinadora institucional de Afundación en Ourense e Lugo.
As imaxes están dispoñibles aquí.
A exposición «Castelao grafista (facsímile)», incluída no programa «Corrente cultural», poderase visitar ata o 26 de febreiro no Espazo Cultural Lorenzo Varela do Concello de Monterroso, de luns a venres, de 10.30 a 19.30 h.
A EXPOSICIÓN «CASTELAO GRAFISTA (FACSÍMILE)»
A exposición, que conta con pezas procedentes das coleccións de arte de ABANCA e Afundación, componse dunha escolma rigorosa de obras nas que se reflicte a evolución tanto do compromiso ético, social e político do artista rianxeiro, como dos seus recursos plásticos e a súa querenza pola ilustración. O seu interese pola palabra e pola imaxe consolidouse nas colaboracións que, a partir de 1924, empezou a publicar en medios como Galicia, Faro de Vigo ou Vida Gallega, nas que a ilustración e o texto reflicten a ácida crítica dun Castelao cada vez máis comprometido. Esta forma de arte e denuncia acabaría articulando obras tan relevantes como Cousas da vida (1930) e os álbumes de guerra Galicia mártir (1937), Atila en Galicia (1937) e Milicianos (1938).
No ano 1945, tras case unha década vivindo no exilio, Castelao rematou o que sería considerado como o seu testamento pictórico, A derradeira leición do mestre, unha tea na que se retoma unha ilustración de guerra elaborada en 1937. Nela, Castelao funde ilustración e pintura en homenaxe ás mestras e mestres asasinados tras o golpe de Estado de 1936.
A mostra reúne facsímiles da Colección de Arte Afundación e debuxos do álbum Cousas da vida de Castelao, dos que pertencen á Colección de Arte ABANCA. Ademais, poderanse ver retratos fotográficos, caricaturas, debuxos e portadas de revistas.