ABANCA, Afundación e o Concello de Xinzo de Limia presentan «Destino. Unha peregrinación de Manuel Valcárcel»
O Concello de Xinzo de Limia, ABANCA e Afundación, a Obra Social de ABANCA, inauguraron hoxe a exposición «Destino. Unha peregrinación de Manuel Valcárcel», nun acto que contou coa presenza do alcalde do Concello de Xinzo de Limia, Amador Díaz; o concelleiro de Cultura do Concello de Xinzo de Limia, Carlos Gómez; a directora da oficina de ABANCA en Xinzo de Limia, Pilar Sobrino; Mateo Alonso San Román, coordinador institucional de ABANCA en Ourense; e Beatriz Fernández-Anguiano, coordinadora institucional de Afundación en Ourense e Lugo. A mostra poderase visitar ata o vindeiro 16 de xaneiro, de luns a venres en horario de 9.00 a 14.30 h e de 15.30 a 21.00 h na Casa da Cultura de Xinzo de Limia.
«Destino» componse de catro peregrinacións en catro países de catro continentes ―O Tíbet, Senegal, México e Galicia― alicerzándose na fotografía documental como ferramenta narrativa e contando distintas historias unidas por un mesmo sino. Concíbese esta expedición como unha viaxe en espiral de seres humanos unidos e guiados polo destino, na busca de respostas a preguntas universais que nos atinxen a todas as persoas do mundo.
Á súa vez, esta exposición realiza a súa particular viaxe polas diferentes localidades de Galicia nas que se mostra dentro do programa «Corrente cultural», que permite a Afundación programar actividades culturais, grazas á colaboración cos concellos e con ABANCA.
Nesta terra de emigrantes e peregrinos sabemos mellor ca ninguén da importancia vital da viaxe, un percorrido físico que implica, en paralelo, unha reflexión interior sobre os nosos valores, a nosa identidade e as nosas necesidades. Nas catro peregrinacións do fotógrafo galego Manuel Valcárcel fálasenos de familia, de emigración, de envellecemento, de sostibilidade e de fogar, grandes temas da humanidade que teñen a súa correspondencia no labor social de Afundación, a Obra Social de ABANCA, e que nesta exposición afloran a través da viaxe interior e física de Valcárcel e das súas potentes imaxes cargadas de emoción, vida e cor.