ABANCA, Afundación e o Concello de Cuntis amosan a mostra «Nós tamén fomos emigrantes»

ABANCA, Afundación e o Concello de Cuntis inauguraron esta mañá a exposición «Nós tamén fomos emigrantes. Fotografías da Axencia EFE sobre a emigración española no século XX», que se poderá contemplar na Casa da Cultura Roberto Blanco Torres de Cuntis ata o 14 de febreiro, de luns a venres en horario de 16.00 a 21.00 h e os sábados de 10.30 a 13.30 h. Ao acto asistiron o alcalde do Concello de Cuntis, Manuel Campos, e a directora da oficina de ABANCA de Cuntis, María José Martines.

Esta colaboración forma parte do proxecto «Corrente cultural», que considera a arte como un instrumento imprescindible para fomentar o coñecemento e o desenvolvemento colectivo. Grazas a este proxecto, Afundación, a Obra Social de ABANCA, impulsa a capilaridade da cultura en Galicia, ampliando a oferta artística máis aló das súas sedes e trasladándoa ás localidades galegas para desenvolver tamén nelas as actividades da entidade.

A exposición consiste nunha selección de corenta fotografías da emigración, tanto española como galega, procedentes dos arquivos da Axencia EFE. O obxectivo é o de tratar de achegarnos a esa realidade histórica a través dunha síntese fotográfica das migracións mediante a mirada profesional e humana dos fotoxornalistas da época. É a historia de «millóns de españois que tiveron que abandonar a súa terra para sobrevivir», en palabras de Miguel Ángel Gozalo, director da Axencia EFE entre 1996 e 2004.