Estudantes e profesorado da UIE retiran catro toneladas e media de uña de gato da contorna do Faro de Corrubedo

215 persoas voluntarias, entre estudantes e profesorado da Universidad Intercontinental de la Empresa, participaron dunha intensa mañá de voluntariado ambiental dedicada á retirada de Carporbrotus edulis na que conseguiron eliminar máis de catro toneladas e media desta especie botánica invasora. Popularmente coñecida como uña de gato ou herba do coitelo, está moi estendida pola costa e afecta gravemente á biodiversidade autóctona por mor dos seus efectos tapizantes sobre o chan, impedindo deste xeito o crecemento de especies autóctonas propias destes ecosistemas costeiros de gran valor ambiental.

As imaxes da xornada están dispoñibles nesta ligazón.

A actividade, que contou coa colaboración do Concello de Ribeira, forma parte de dúas grandes iniciativas ambientais impulsadas por Afundación, PLANCTON, o plan de conservación territorial que xa conseguiu retirar dos mares e costas de Galicia máis de 136 toneladas de lixos mariños e máis de 16 toneladas de especies botánicas invasoras, e o programa «Educación para a sostibilidade». Con estes proxectos a Obra Social de ABANCA, cimenta o seu compromiso de inculcar na sociedade a necesidade de protexer os múltiples e variados recursos naturais cos que conta, co fin de promover a súa conservación e garantir o seu uso e desfrute para as xeracións do futuro. Actividades como a realizada hoxe en Corrubedo propician o sentido de pertenza e de responsabilidade no coidado da contorna, e empoderan á mocidade como gran axente de cambio.

Coa xornada de hoxe, Afundación retoma as actividades de voluntariado ambiental no marco de PLANCTON tras a pausa do verán.