Patronato

Nado en 1960, é licenciado en Medicina e Cirurxía pola Universidade de Santiago de Compostela e especialista en Cirurxía Ortopédica e Traumatoloxía. Iniciou a súa carreira no ámbito sanitario como médico laboral no Servizo de Urxencias do Hospital Provincial de Ourense e posteriormente como médico funcionario no Servizo de Traumatoloxía e Cirurxía Ortopédica do mesmo hospital, obtendo o número un en ambas oposicións.

A súa traxectoria profesional desenvolveuse tanto na medicina como na administración pública. Foi director xeral de Xuventude da Xunta de Galicia (1990-1995), vicepresidente da Deputación de Ourense (1995-2001), vicepresidente da Federación Galega de Municipios e Provincias e director provincial do Servizo Galego de Saúde (SERGAS) en Ourense. No ámbito internacional, ocupou o cargo de conselleiro de Traballo e Asuntos Sociais na Embaixada de España en Brasil (2001-2004), delegado da Fundación Galicia Saúde en Arxentina (2005-2006) e secretario xeral de Emigración da Xunta de Galicia (2009-2012). Posteriormente, foi conselleiro de Emprego e Seguridade Social nas embaixadas de España en Arxentina (2012-2017) e Venezuela, con acreditación en Colombia e República Dominicana (desde 2017).

Autor de máis de 20 estudos en medicina, cirurxía e ortopedia en revistas científicas nacionais e internacionais, foi relator en cursos e seminarios sobre traumatoloxía e seguridade social en Brasil, Arxentina e República Dominicana.