Equipo directivo

Doutor (Ph.D.) en Psicoloxía e Educación pola Universidade de Nebraska en Lincoln e mestrado (M.A.) en Psicoloxía e Administración da Educación Superior pola Universidade de Texas en Austin. Licenciouse en Psicoloxía Clínica pola Universidade Javeriana de Bogotá (Colombia) e realizou estudos de enxeñería na Universidade Politécnica de Madrid e na Universidade do Zulia en Maracaibo (Venezuela).

Profesor emérito e ex-decano da Universidade de Texas e ex-director do Instituto de Posgraduado e Formación Continua da Universidade de Deusto. Anteriormente exerceu como director de investigación e profesor de Planificación e Desenvolvemento e como director dos estudos de mestrado e doutorado de Florida International University (FIU). Director emérito da Cátedra UNESCO sobre Historia e Futuro da Universidade, no programa UNITWIN de UNESCO en Bos Aires e París. Foi fundador e vicerreitor da Universidade Nacional Aberta de Venezuela.

Na actualidade é presidente de Afundación e reitor presidente do Instituto de Educación Superior Intercontinental de la Empresa (IESIDE), a primeira institución de educación superior en Galicia orientada á empresa creada a iniciativa de Afundación. Ambas institucións forman parte da área de Responsabilidade Social Corporativa de ABANCA da cal é director xeral.

O doutor Escotet exerceu, ademais, como secretario xeral da Organización de Estados Iberoamericanos (OEI) en Madrid; conselleiro especial do director xeral da UNESCO en París; director executivo do Consello Universitario Interamericano para o Desenvolvemento Económico e Social (CUIDES) en Washington D.C.; reitor e fundador da Universidade Iberoamericana de Posgraduado; e asesor técnico do Banco Mundial, Banco Interamericano de Desenvolvemento, Organización de Estados Americanos, OCDE, Nacións Unidas, UNESCO e diversas organizacións non gobernamentais.

No campo da investigación, os seus principais intereses centráronse na filosofía e a reforma da educación superior e a innovación, no desenvolvemento de metodoloxías de investigación para estudos interculturais e na aprendizaxe cultural. Entre as súas múltiples publicacións destacan a súa obra máis recente, Análisis multivariado en ciencias humanas (2017), así como Investigación científica en la universidad, Modelo de innovación en educación superior, Cultural and Social Foundations of Education: An Interdisciplinary Approach, Universidad y devenir, Aprender para el futuro, El mundo de la percepción, Teoría y praxis de la universidad a distancia, Educación y desarrollo, Cultural Learning, Distance Education in International Perspective, Cuestionario investigativo de la personalidad. Á súa vez, Psychosocial Nature of Education (Pearson Publishing) céntrase nas dimensións interculturais da educación e a súa relación coa psicoloxía, a antropoloxía e a socioloxía.