Patronato

Nada en Ferrol en 1970, é licenciada en Belas Artes pola Universidade de Salamanca e doutora en Arte pola Universidade de Vigo. Profesora titular na Universidade de Vigo desde 1994, imparte docencia na área de estudos culturais de deseño e análise de tendencias. Cunha ampla traxectoria en xestión académica, foi vicedecana da Facultade de Belas Artes de Pontevedra e directora dos Estudos Superiores de Deseño de Moda (2004-2020). Na actualidade, dirixe o Mestrado Universitario en Deseño e Dirección Creativa en Moda da Universidade de Vigo.

Como investigadora, lidera desde 2005 o Tracker Laboratorio Visual, desenvolvendo proxectos financiados en concorrencia competitiva sobre a relación entre deseño, artesanía e cultura dixital. Comisariou exposicións como Queridas cousas: Historias vestidas (2022), ¡Imposible! Vestidos especulativos (2021) e Especulacións utópicas: Interseccións entre moda e arte (2019). Foi asesora da exposición Con-Fío en Galicia (Museo Centro Gaiás, 2016) e dirixe a pasarela DEBUT en Pontevedra desde 2007.

Autora de numerosas publicacións sobre deseño de moda e sustentabilidade, dirixiu múltiples teses doutorais e participa en consellos editoriais e comités académicos de congresos internacionais. No ámbito da divulgación, editou o volume Deseño e moda. Un achegamento interdisciplinario e colaborou en diversas publicacións especializadas en deseño e creación contemporánea.