Resolución do XIX PREMIO DE XORNALISMO FERNÁNDEZ DEL RIEGO en Pontevedra

O Café Moderno Afundación de Pontevedra celebrou o acto de entrega do XIX Premio Afundación de Xornalismo Fernández del Riego o martes 25 de outubro, outorgado a Francisco Castro polo seu artigo «Coiden da música» publicado en La Voz de Galicia. 

Acompañaron o premiado, ademais das outras dúas persoas finalistas, Cláudia Morán e Diego Giráldez, todas as persoas que conformaron nesta edición o xurado: Víctor Freixanes, presidente do xurado; Carlos Valle, secretario; Fina Casalderrey, vogal; Míriam Ferradáns, vogal; e Gloria Rodríguez López, vogal.

Tamén Camiño Noia, escritora, filóloga e profesora emérita da Universidade de Vigo, participou do acto, facendo unha introdución sobre a sobranceira figura de Francisco Fernández del Riego, a quen se lle dedicará o Día das Letras Galegas no vindeiro 2023. A raíz desta homenaxe, convocamos a vixésima edición do Premio Afundación de Xornalismo Fernández del Riego, que presentará as súas persoas finalistas no mes de maio, coincidindo coa celebración do Día das Letras Galegas.

FRANCISCO CASTRO naceu en Vigo en 1966, no barrio de Teis. É escritor e director da Editorial Galaxia, comentarista na TVG, RG, articulista en La Voz de Galicia e na prensa de Catalunya. É membro do Consello da Cultura Galega na sección de Pensamento. Está traducido ao castelán, catalán, éuscaro, serbio, italiano, inglés e portugués do Brasil. Posúe unha gran parte dos premios literarios galegos e tamén de xornalismo polos seus artigos de opinión. Tres das súas novelas infantís están incluídas nas prestixiosas listas IBBY que recoñecen os mellores libros do mundo. Os seus últimos libros, polo de agora, son o ensaio Isto SI é un home e Eso no estaba en mi libro de los Beatles.

Embaixo de todo podes ler o artigo en PDF.