Mostra «Voando o pasado. Fotografía aérea e arqueoloxía en Galicia». Ourense

Do 6 de outubro ao 10 de decembro visita na Sala de exposicións Afundación de Ourense a mostra do Museo Arqueolóxico Provincial de Ourense «Voando o pasado. Fotografía aérea e arqueoloxía en Galicia». Documentos excepcionais, imaxes a vista de paxaro que nos permiten recuperar unha parte da memoria arqueolóxica galega.

A fotografía aérea aplicada á investigación do patrimonio cultural permítenos obter, a vista de paxaro, imaxes globais das paisaxes históricas, do patrimonio arquitectónico e dos xacementos arqueolóxicos coma se se debuxasen nun plano. Dentro dos diferentes tipos de xacementos recollidos nesta exposición, son os castros o grupo máis numeroso e o máis facilmente identificable na imaxe aérea debido á súa monumentalidade e morfoloxía. Ademais, vías e calzadas romanas, campamentos, minaría aurífera, asentamentos coma as villae, as fortalezas medievais e palacianas renacentistas ou as vilas encasteladas. Imaxes imposibles de captar polo ollo humano desde terra que converten a fotografía aérea nun documento excepcional.

Xa o 22 de novembro de 1910 o globo Urano, viaxeiro por Galicia en 1904 e 1907, se elevou en terras sorianas «para ver de lograr o plano de Numancia» e, despois de subir a 200 m de altura, «puido obter, aínda con movementos do globo, tres placas do solar numantino, unha da vila de Garray e outra da vista de Garrejo». Aparece, así, a primeira aplicación da fotografía aérea arqueolóxica en España.

A conxunción de enfoque, luz, sombra, cor e textura fai posible contemplar toda unha serie de anomalías ou trazas do subsolo que, correctamente descifradas, nos axudan a identificar, estudar e protexer os diferentes bens que conforman a memoria material do noso pasado.