Visita guiada ao Pazo Molinos de Antero

A tarde do 20 de novembro, o Centro de Maiores Afundación de Monforte de lemos ofrece aos seus socios unha visita guiada polo Pazo Molinos de Antero. Os socios que queiran participar, poderanse inscribir no propio centro.

O Pazo Molinos de Antero, símbolo da historia de Monforte de Lemos e punto de saída do turismo da Ribeira Sacra, vese reflectido nunha nova, fresca e moderna imaxe que amosa respecto pola historia e polos símbolos da casa e a familia.

A casa construíuse entre finais do século XVIII e principios do XIX. O Pazo Molinos de Antero foi fundado por Manuel Antero Yáñez Rivadeneira sobre unha construción anterior. A súa función fundamental era a de centro de recadación das rendas do tabaco e outros impostos para a corte. Por este motivo, o pazo dispuña e conserva parte dun enxeñoso sistema de seguridade. Hai unha gradicela en cada recuncho e en cada habitación, desde onde se vixiaba a todo o mundo que entraba na vivenda.

O edificio é orixinal e distínguese doutros pazos galegos por unha peculiar arquitectura afrancesada, unha decoración pictórica italianizante das súas estancias, executada polo pintor da comarca de Sober, Juan P. de Castinande.

No pazo consérvase un arquivo que consta de varias partes: unha familiar e outra referente ás rendas reais. Pódense ver cuartos con roupas e mobles orixinais. Ademais, ten unha capela na que se rezaban misas a diario e pinturas orixinais que o tempo non puido borrar.