Á venda a TEMPADA DE ABONOS DE TEATRO | outono 2023 en Vigo
Velaquí unha nova Tempada de Abonos de Teatro Afundación para que poidas desfrutar das mellores obras nacionais no teu Teatro de Vigo comodamente e con prezos axustados. Programa a túa diversión cultural para o vindeiro outono 2023, de setembro a decembro.
VENDA
As persoas abonadas da última tempada poden renovar o seu abono, reservando as mesmas cadeiras os días 5 e 6 de xuño de 11.00 a 14.00 e de 17.00 a 19.00 h na billeteira do Teatro Afundación, Marqués de Valladares, s/n. Venda dos abonos en xeral do 7 de xuño ao 10 de setembro en www.ataquilla.com
Venda de entradas soltas a partir do 11 de setembro en www.ataquilla.com e na Sede Afundación de Vigo, Policarpo Sanz, 26.
Para máis información, 986 120 078
CALENDARIO
EQUUS | xov 19 OUT | 20.30 h
MILES GLORIOSUS | mér 25 OUT | 20.30 h
UN OSCAR PARA ÓSCAR | mar 21 NOV | 20.30 h
EL LIBRERO DE AZAÑA | mér 29 NOV | 20.30 h
ADICTOS | mér 6 DEC | 20.30 h
Todos os abonos teñen un 20 % de desconto con respecto ao prezo do billete.*
* Gastos de xestión á parte
Outras bonificacións e descontos xerais
• Persoas mozas: carné xove
• Persoas maiores de 65: carné de xubilación
• Persoas desempregadas: carné correspondente
Aplicarase un desconto adicional do 10 % con respecto ao prezo do abono.
A programación poderá estar suxeita a cambios.
A duración das obras é aproximada.
OBRAS
EQUUS de Peter Shaffer | DIRECCIÓN Carolina África | VERSIÓN/ ADAPTACIÓN Natalio Grueso | ELENCO Roberto Álvarez, Álex Villazán, Jorge Mayor, Mamen Camacho, Claudia Galán | PRODUCIÓN OKAPI Producciones
1 h 40 min | Castelán | NRM 16
«Unha obra que te manterá en suspenso até chegar ao sorprendente desenlace final»
Esta xoia da dramaturxia universal tráenos un texto complexo no que o psiquiatra Martin Dysart recibe o encargo máis difícil da súa carreira profesional, debe tratar un mozo que cometeu un acto brutal: sacar os ollos cun punzón á media ducia de cabalos que coidaba. A partir de aquí comeza unha investigación en que o psiquiatra deberá pescudar sobre que levou a este mozo de boa familia, que xamais tivera un problema, a cometer tal atrocidade. Seguindo as regras do thriller psicolóxico, o psiquiatra vai indagando na vida do raparigo para axudalo e, mentres, terá que loitar tamén cos seus propios demos persoais...
MILES GLORIOSUS de Plauto | DIRECCIÓN Pep Anton Gómez | VERSIÓN Antonio Prieto | ELENCO Carlos Sobera, Ángel Pardo, Elisa Matilla, Silvia Vacas, Juanjo Cucalón, David Tortosa, Antonio Prieto, Arianna Aragón | PRODUCIÓN Festival de Teatro Clásico de Mérida e Arequipa Producciones
1 h 40 min | Castelán | NRM 14
«Unha montaxe divertidísima onde cada un dos seus intérpretes brilla con luz propia»
Miles é un prototipo de home que nos resulta moi familiar. Deixando de lado a súa condición de militar, invicto por suposto, Miles é un tipo empoderado, fantoche, pagado de si mesmo, narcisista e obsesionado co sexo. Cre firmemente que todas as mulleres o adoran e pretende a todas. Vive en Éfeso xunto a Cornelia, unha bela princesa da que pensa, bebe os ventos por el, esquecendo o pequeno detalle de que a ten secuestrada... Mais a situación pode dar unha volta radical. O criado de Miles, farto do seu xefe perturbado, decide axudar a rapaza e, así, de paso, traza un brillante plan para escarmentalo coa axuda da veciñanza.
UN OSCAR PARA ÓSCAR de Mario Hernández | DIRECCIÓN Mario Hernández | ELENCO Jon Plazaola, Agustín Jiménez, Rebeca Sala, Mara Guil | PRODUCIÓN Txalo Producciones e La Mandanga
1 h 30 min | Castelán | NRM 12
«Esta peza eríxese coma unha homenaxe ao estilo de Miguel Mihura, combinado co espírito de Luis García Berlanga»
Estamos na cidade de Los Ángeles o día que se celebra a cerimonia dos Oscar; concretamente, nun modesto motel nos arredores. Alí están Óscar Manzano, nomeado aos premios pola curtametraxe que dirixe, canda o ministro de Cultura Guillermo Barrientos e a ministra de Facenda Irene Navarro. Entre continuas liortas dos dous políticos, e a poucas horas de empezar a cerimonia, aparece Pauline, unha «escort girl» contratada ás agachadas para que finxa ser a noiva de Óscar durante a gala... Este imposible grupo de catro vivirá a noite máis tola das súas vidas, debaténdose entre os seus soños e todo o que perden no camiño para conseguilos.
EL LIBRERO DE AZAÑA de Miguel Murillo Gómez | DIRECCIÓN E DRAMATURXIA Francisco Suárez | ELENCO Jacobo Dicenta, Ana Fernández, Juanma Navas, Alberto Lucero, Isabel Moreno | PRODUCIÓN Producciones Faraute
1 h 30 min | Castelán | TP
«Quen foi Manuel Azaña?»
De ser a encarnación da liberdade e da República a figurar durante moitos anos coma o monstro máis infame, Manuel Azaña foi un mito e símbolo español que, por certo, tamén chegou tarde á súa cita co tempo que lle tocou vivir. Desde unha librería de vello no Madrid que segue a ser unha ligazón entre o vello e o moderno, a historia pasa vertixinosamente no seu escaparate e os libros reflicten os sucesos máis decisivos de vinte anos da nosa historia. Cosme, Pascual, Consuelo e Encarna, xunto ao pobo español, observan o que ocorre, e pensan a Azaña, intúeno, interprétano, ámano e ódiano, e esperan algo que, coma sempre, non chega.
ADICTOS de Daniel Dicenta Herrera e Juanma Gómez | DIRECCIÓN Magüi Mira | ELENCO Lola Herrera, Ana Labordeta, Lola Baldrich | PRODUCIÓN Jesús Cimarro
1 h 20 min | Castelán | NRM 16
«Adictos somos todos…»
Esta obra xorde da necesidade de abordar unha problemática que nos afecta a todas as persoas: ata que punto a tecnoloxía nos somete? Somos libres? Que tipo de sociedade construímos? Que nos trae o futuro? Merecemos o cualificativo de «seres humanos»? A realidade de Adictos é a da expansión progresiva da desinformación. Unha ficción que manifesta inquedanzas que nos incumben a todos e a todas, cuestionando aquilo asumido como certo. Este texto reivindica a capacidade de reacción do ser humano, ese punto de rebeldía necesario para que as cousas evolucionen cara a unha vida tecnoloxicamente sa e socialmente libre.
Esta tempada de abonos encádrase no programa solidario CULTURA POR ALIMENTOS, en colaboración con FESBAL. Convidámosvos a colaborar traendo alimentos non perecedoiros que se poden depositar no acceso ao edificio, e que serán destinados aos bancos de alimentos locais.