Obradoiro de costura colaborativo, CHUO - Espazo +60 Ourense

As voluntarias do obradoiro solidario do Espazo +60 de Ourense desenvolverán un obradoiro básico de costura dirixido aos pacientes do hospital de día do servizo de psiquiatría, co obxectivo de fomentar a creatividade, a concentración e a interacción social nun ambiente acolledor.

Esta iniciativa solidaria súmase a outras accións conxuntas entre o Espazo +60 Afundación de Ourense e o Servizo de Atención ao Paciente e Humanización da Área Sanitaria de Ourense, Verín e Valdeorras. Entre elas destacan a elaboración artesanal de almofadas solidarias para pacientes sometidas a intervencións por cancro de mama, manguitos para nenos e nenas hospitalizados e, máis recentemente, a entrega de almofadas de lactación.

O obradoiro será dinamizado polas propias voluntarias, que achegarán o seu coñecemento e experiencia, ofrecendo un acompañamento próximo e adaptado ás necesidades das persoas participantes.

Esta actividade fai especial fincapé na importancia do benestar emocional dos pacientes, promovendo a compañía e unha atención próxima, empática e humana.