Concerto de Oh! Ayatollah. Santiago de Compostela
Oh! Ayatollah volve coa canción protesta no seu último LP. Nove cancións que se moven entre a enerxía new wave do primeiro sinxelo, que leva o título do disco: Volve a canción protesta, á delicadeza pop de cancións coma «Familia Política» e o case punk de «Pablo Callejo» ou «Ei ei». As letras seguen a ser pura apoloxía da xuventude, o amor e a frustración, sobre a vida entre amigos que nos dan asco («Case todo é o que parece») e festas que nos deixan a gorxa desfeita («Animal»). Co gallo do proxecto cultural Sonoro empeño, chegan ao noso Centro Obra Social ABANCA na praza de Cervantes o 15 de maio.
OH! AYATOLLAH
É un grupo de pop que naceu en Santiago de Compostela a finais de 2015, a través da xuntanza de varias persoas que coincidiron estudando nesta cidade, todas cunha semellante sensibilidade no musical e ganas de pasalo ben tocando.
En abril de 2016 sacan a súa primeira referencia, un EP de cinco cancións titulado Cancións por se non te quere xa. En novembro dese mesmo ano sae o seu videoclip Mi, Re, La, realizado polos irmáns Miranda, que levará o premio ao Mellor Videoclip na sección do xurado do Festival de Cans de 2017. A comezos de 2017, soben o seu vídeo-single Mi, Re, La / Nunca Máis.
Simultaneamente a todo isto, xiran sen parar por toda a xeografía galega, tendo actuado no I Festival do Leite de Santiago de Compostela, no Galegote Rock 2017 en Pontevedra, na Sala Mardi Grass da Coruña, na Festa Cidade Europea do Viño en Cambados, etc.
Actualmente seguen de xira co seu LP que viu a luz en 2018.
SONORO EMPEÑO
Arte e música danse a man na capital galega, e transforman o Centro Obra Social ABANCA e o Auditorio ABANCA de Santiago de Compostela nun potente, dinámico e sonoro altofalante.
O proxecto cultural SONORO EMPEÑO ofrece un compendio de actividades anovadoras e orixinais, con eixe na mostra homónima que conta con algunhas das obras máis destacadas da Colección de Arte Afundación e ABANCA. Un universo de experiencias orientado a diferentes públicos e deseñado para gozar coa música en moitas das súas variantes, e do diálogo desta con outros conceptos coma a pintura, poesía, escultura, cinema, tecnoloxía, cociña ou ciencia. En conxunto, unha oferta encamiñada a xerar unha experiencia musical, sinestésica e inesquecible. A partir do 25 de marzo.
Coñece aquí toda a programación!
