Representación de final de curso do grupo de teatro Espazo +60 Pontevedra

A sede de Afundación en Pontevedra acollerá o vindeiro 2 de xuño, ás 18:30 horas, a representación teatral de El genio alegre, interpretada polo grupo Espazo + 60 Pontevedra.

A obra, escrita polos irmáns Álvarez Quintero, retrata a vida na casa dos marqueses dos Arrayanes, onde conviven a austera dona Sacramento, o seu fillo gastador Julio e o triste administrador don Elías. A chegada de Consolación, coñecida como “o xenio alegre”, transformará por completo o ambiente da casa.

A representación estará dirixida por Margarita García e contará cun elenco formado por Elisa Prieto, Pilar Pastor, Antonia Rosales, Marisa Loureiro, Celia Bermejo, Amelia Estévez, Lourdes Cabirta, Carmen Gómez, Jeremías Ferrero, Ernesto Cebrián, Fran Mares, Ramiro Pórtela, Eduardo Rego, Onofre Piñeiro e Andrés Rodríguez.

Esta representación enmárcase dentro do programa solidario Cultura por Alimentos. Convidámoste a colaborar traendo produtos non perecedoiros á función, que poderás depositar na entrada para a súa doazón aos bancos de alimentos locais. A túa ilusión compartida móvenos!