Programa “AFONDANDO NAS EMOCIÓNS”, Espazos +60

Se xa participaches no programa “Coñecendo as emocións”, presentámosche un programa para afondar nos seus contidos.

Afondando nas emocións

«Afondando nas emocións» xorde do desexo expresado polas persoas participantes no programa «Coñecendo as emocións» de seguir avanzando no proceso de mellora das súas competencias emocionais e na adquisición de ferramentas que promovan o seu benestar emocional. Este programa foi codeseñado coas facilitadoras que o implementaron nas súas primeiras edicións.

Esta nova proposta conta con 222 persoas participantes desde a súa primeira edición e parte da experiencia desenvolvida nas cinco edicións de “Coñecendo as emocións”, nas que xa participaron máis de 1.200 persoas maiores. Estrutúrase en 8 sesións, cunha periodicidade semanal de 2 horas cada unha, e os seus contidos teñen un carácter flexible, polo que poden variar en función dos intereses do grupo.

1. Lembrando contidos: a “roda das emocións”.
2. Estratexias de regulación existentes e desexadas.
3. Culpa.
4. Soidade.
5. Medo e ansiedade.
6. Autovalor.
7. Estilos comunicativos I.
8. Estilos comunicativos II.

Ademais de servir como recordatorio do tratado no primeiro programa, abordaranse emocións e sentimentos máis complexos como a culpa, a ansiedade, a soidade, o medo, a autoestima ou a comunicación, entre outros. As persoas participantes elixen onde poñer o foco e que priorizar, tomando como base situacións concretas do día a día para traballar sobre elas.

“Levo comigo o goce das cousas pequenas, o ter remontado a miña vida en soidade, algo que me estaba resultando bastante difícil de afrontar, xa que vivir soa non é doado, aínda que se teña familia preto. Descubrín un abano de emocións pequenas, sinxelas e cotiás que pasaban desapercibidas e non sabía desfrutar” (Eva, Espazo+60 Ourense).

Por que un programa avanzado?

Esta proposta baséase nos resultados da investigación realizada en 2022 para avaliar os beneficios de participar no programa “Coñecendo as emocións”, que se poden resumir nos seguintes resultados:

• A maioría das persoas expresaron que o programa fora moi satisfactorio, pero que lles gustaría seguir profundando nas emocións.
• A participación contribuíu a unha mellora global do benestar psicolóxico.
• Mellorou a atención prestada ás emocións, primeiro paso para poder intervir conscientemente sobre elas.
• Mellorou a comprensión dos seus estados emocionais e dos das demais persoas.
• Mellorou a expresión emocional, o que á súa vez repercutiu nunha mellora das relacións cos demais.
• Mellorou a capacidade das persoas participantes para regular os seus estados emocionais de forma consciente.

Como inscribirte

Acude ao teu Espazo+60 Afundación.

Espazo +60	Datas	Día	Horario
A Coruña	9 feb. a 30 mar.	lun.	16.30 a 18.30 h
Ferrol	2 feb. a 30 mar.	lun.	17.00 a 19.00 h
Monforte	6 feb. a 27 mar.	ven.	11.30 a 13.30 h
Ourense	23 feb. a 13 abr.	lun.	17.00 a 19.00 h
Pontevedra	4 feb. a 8 abr.	mér.	10.30 a 12.00 h
Santiago	14 xan. a 4 mar.	mér.	17.00 a 18.45 h
Vigo	4 feb. a 25 mar.	mér.	17.00 a 19.00 h