Programa EMPRESA FAMILIAR NAS AULAS

Xunto coa Asociación Galega da Empresa Familiar (AGEF), poñemos en marcha a primeira edición do Programa «Empresa Familiar nas aulas», unha iniciativa que ten como finalidade fomentar o emprendemento entre a mocidade a través do seu contacto directo co mundo empresarial.

 
Diferentes centros escolares de Galicia [6º Primaria e 3º e 4º ESO] poderán gozar de encontros en liña con empresas familiares das catro provincias galegas, enfocando as temáticas ao ámbito empresarial como reforzo ao programa curricular do alumnado.

 

Nesta primeira edición, que arrinca o 18 de xaneiro de 2021, participan: Grupo Aresa de Lugo; Congalsa (Pobra do Caramiñal), Severiano Servizo Móbil (As Pontes), Grupo Tojeiro (Betanzos) e Espina y Delfín (Santiago) da Coruña; Babé e Cia (Vigo), Terras Gauda (O Rosal) e Lodiel (Moaña-Cangas) de Pontevedra; e Grupo Pérez Rumbao e Grupo Revi de Ourense.

 

Os centros educativos que participan nesta edición son:

IES Lucus Augusti (Lugo); CPR Manuel Peleteiro IES Castro da Uz IES as Mariñas e Colexio San José de Cluny (A Coruña); Colexio Maristas, CPI Manuel Suárez Marquier e Colexio Eduardo Pondal (Pontevedra) e CPR Salesianos e CEIP Mestre Vide (Ourense).

 

As persoas responsables das compañías participantes trasladarán a súa experiencia como empresa familiar a máis de 400 estudantes a través dunha serie de charlas por videoconferencia. A súa traxectoria familiar e empresarial, os valores dos seus proxectos e a súa importancia, que representa o 92,4 % do tecido empresarial de Galicia e achega o 85 % do VAB empresarial e o 83,3 % do emprego privado da comunidade.

A segunda parte do programa propón ao estudantado coñecer virtualmente estas empresas, podendo coñecer o seu funcionamento, organización e outras características da súa actividade.

O programa pon ao dispor dos centros educativos unha GUÍA DIDÁCTICA elaborada por un equipo de especialistas, que contén unha serie de orientacións e recursos didácticos relacionados coa empresa familiar e o emprendemento.

Ademais de todo isto, o programa tamén prevé a convocatoria da primeira edición do Concurso Imaxina a túa empresa, que persegue reforzar a educación emprendedora e fomentar as vocacións e o espírito emprendedor entre a mocidade. Este certame estará aberto a todo o alumnado participante no programa «Empresa Familiar nas aulas», que deberá desenvolver un traballo no que se explique a creación da súa empresa ideal, de calquera sector ou actividade económica, alén da súa viabilidade.

 

Información polo miúdo na páxina elfrutodelosvalores.com 

 

Asociación Galega da Empresa Familiar
Fundada no ano 2000, a Asociación Galega da Empresa Familiar (AGEF) é a principal asociación de empresas con raíces, sede social e vocación de permanencia en Galicia. A súa función é fortalecer e dar continuidade ás empresas de orixe familiar galego.

A asociación está integrada polas 59 principais compañías galegas, que facturan 9.300 millóns de euros e dan emprego directo a 49 000 persoas.