GOZA DA PRAIA SEN DEIXAR PEGADA. PLANCTON 2022

Baixo o lema «Goza da praia sen deixar pegada», presentamos na illa da Toxa unha campaña informativa coa que se pretende sensibilizar o turismo que visita as praias galegas arredor da necesidade de compatibilizar un uso recreativo dos areais asentado nas boas prácticas, coas actividades socioeconómicas que se levan a cabo nestes espazos naturais, como é o caso do marisqueo.

A campaña, que conta coa colaboración dos concellos do Grove, da Illa da Arousa e de Vilagarcía da Arousa, da Asociación de Mariscadoras de Carril e das confrarías de pescadores de San Martiño do Grove e de San Xulián da Illa da Arousa, desenvolverase ao longo de todo o verán en diferentes areais destes concellos, como a praia de Covadelo na illa da Toxa, a praia de Xastellas na Illa da Arousa, ou a praia de Compostela, en Vilagarcía da Arousa.

Unha exposición itinerante ao aire libre, valos publicitarios, autobuses e outros soportes publicitarios, así como diferentes vinilos instalados nas propias oficinas de ABANCA dos mencionados concellos, servirán para difundir esta campaña, na que se invita as persoas que visitan estes areais a respectar as zonas de cultivo de bivalvos, empregar protectores solares non prexudiciais para o medio mariño ou evitar deixar lixo nas praias, prácticas moi sinxelas que, sen lugar a dúbida, repercutirán en beneficio de todos, tanto dos propios bañistas como das persoas que traballan no mar.

Esta exposición ao pé das praias permanecerá na Illa da Toxa entre o 13 de xullo e 1 de agosto, día no que se trasladará ao Carreirón, na Illa da Arousa, onde ficará ata o 13 dese mesmo mes. Finalmente, trasladarase ata a praia de Compostela, en Vilagarcía da Arousa, onde se poderá  contemplar ata o 12 de setembro.

Ademais, e como complemento a todas estas actuacións, serán as propias mariscadoras e mariscadores das diferentes confrarías as que se encarguen de transmitir de primeira man aos turistas este conxunto de boas prácticas, facilitando ás persoas interesadas diferentes obxectos que axuden a poñelas en práctica, como poden ser os cinseiros portátiles para evitar o depósito ou enterramento de cabichas nas praias ou unhas bolsas portátiles destinadas a retirar lixo durante os paseos.

 
PLANCTON, o Plan de Conservación Territorial no que se enmarca esta nova iniciativa impulsada por Afundación, é parte da estratexia de sostibilidade de ABANCA e a súa obra social, e ten como obxectivo fomentar a conservación e a sostibilidade das actividades socioeconómicas que se levan a cabo en diferentes lugares de Galicia que contan con elevados valores no campo ambiental. Neste sentido, e grazas ás diferentes actuacións de limpeza levadas a cabo desde que principiara o proxecto o pasado ano, son xa máis de 25 as toneladas de refugallos retiradas dos fondos marisqueiros, das praias e outros enclaves da costa de Galicia.