PLANCTON 2022. Limpeza de lixos mariños na praia de Area en Viveiro

Desde Afundación convocamos mañá unha nova xornada de limpeza de residuos dentro do Plan de Conservación Territorial On (PLANCTON). Nesta ocasión, serán as e os escolares do CPR Landro, canda un nutrido grupo de persoas voluntarias tanto da Asociación de Persoas con Discapacidade Intelectual (ASPANANE), coma do Espazo +60 de Viveiro, quen se encarguen de retirar os residuos que atopen durante a xornada na praia de Area, en Viveiro. A actividade ten como obxectivo, ademais da limpeza, promover a concienciación sobre a importancia de que como sociedade actuemos de forma responsable para manter os recursos. Desenvolverase desde as 11.00 ata as 13.00 h.

PLANCTON é un proxecto multidisciplinar, enmarcado dentro da estratexia de sostibilidade de ABANCA e Afundación, que ten como obxectivo principal fomentar a conservación e a sustentabilidade das actividades socioeconómicas que se levan a cabo en catro das Zonas de Especial Protección para as Aves de ámbito mariño existentes en Galicia, e ata a data conseguiu retirar xa 20 toneladas de residuos de areeiros e fondos repartidos por diferentes localidades ao longo da costa galega.

MÁIS INFORMACIÓN sobre este programa.