PLANCTON 2022. Limpeza de fondos marisqueiros no Grove e Cambados

O venres 22 de abril convocamos unha dobre xornada de limpeza de lixos mariños nos fondos marisqueiros do Grove e Cambados no marco de PLANCTON, o plan de conservación territorial iniciado o pasado ano, que xa leva recollidas máis de 22 toneladas de refugallos das praias e fondos de Galicia.

Nesta nova actuación, a cuarta no que vai de ano, participará un amplo grupo de persoas voluntarias integrado por mariscadoras da Confraría de San Martiño do Grove e do propio programa de voluntariado Actúa de Abanca e Afundación, que contarán co apoio e colaboración dos concellos do Grove e Cambados á hora de retirar os residuos dos diferentes enclaves de actuación, tanto na contorna da illa da Toxa, como nas zonas de Correlo e Insuíña, lugares nos que o pasado ano xa foron recollidas máis de 10 toneladas de refugallos en actuacións similares.

O proxecto PLANCTON, enmarcado dentro da estratexia de sustentabilidade de ABANCA e Afundación, ten como obxectivo principal fomentar a conservación e a sustentabilidade das actividades socioeconómicas que se levan a cabo en determinadas Zonas de Especial Protección para as Aves de ámbito mariño de Galicia así como noutros lugares de especial relevancia.

MÁIS INFORMACIÓN sobre este programa.