PLANCTON 2022. Limpeza de fondos en Areoso con mergulladores e navalleiros

Tras os exitosos resultados obtidos por Afundación e o seu Plan de Acción Territorial ON (PLANCTON) o pasado ano, onde se conseguiron retirar case 19 toneladas de lixos mariños de diferentes enclaves costeiros repartidos pola xeografía galega, retomamos as rendas deste ambicioso proxecto ambiental o sábado 5 de marzo coa que será a terceira das actuacións de limpeza que levará a cabo nunha contorna tan paradisíaca coma a do illote Guidoiro Areoso, un tesouro de biodiversidade situado en pleno corazón da Ría de Arousa.

Será un equipo mixto integrado polos navalleiros da Confraría de Pescadores da Illa de Arousa e por mergulladores deportistas do Club Subacuático Pérez-Sub, bos coñecedores da zona, o que se mergulle baixo as augas circundantes ao illote Guidoiro Areoso co obxectivo de retirar dos seus fondos todos cantos residuos se atopen durante as inmersións expostas para esta nova xornada de limpeza, un lugar no que xa se actuou o pasado ano, contando mesmo coa participación directa do propio presidente de ABANCA, Juan Carlos Escotet, e do seu conselleiro delegado, Francisco Botas, e onde se conseguiron retirar máis de dúas toneladas de refugallos que nunca deberon chegar alí. Prestarán o seu apoio desde as diferentes embarcacións representantes do propio concello da Illa de Arousa, así como da Federación Galega de Actividades Subacuáticas (FEGAS), de Protección Civil de Vilanova de Arousa e do SEMAR, o Servizo Marítimo da Garda Civil.

O proxecto PLANCTON, no que se enmarca a actividade, expón entre os seus obxectivos principais fomentar a conservación dos mares galegos e a sustentabilidade das actividades socioeconómicas que leva a cabo nos mesmos, e configurándose deste xeito como un dos eixos clave dentro da estratexia de sustentabilidade de ABANCA e Afundación e das súas actividades de voluntariado ambiental, converténdose nun gran eixo vertebrador de distintos axentes, entre os que se atopan diferentes entidades do sector pesqueiro, como as confrarías de pescadores e asociacións de mariscadoras, os grupos de Acción Local Pesqueira (GALP), ANMUPESCA, concellos, Garda Civil e Protección Civil, así como outra serie de institucións do terceiro sector como as asociacións Bata ou Con Eles, ademais do Parque Nacional Marítimo Terrestre das Illas Atlánticas de Galicia ou a propia Federación Galega de Actividades Subacuáticas quen colabora activamente nesta nova actuación de limpeza.

Coa deste sábado darán comezo toda unha serie de actuacións similares que se desenvolverán ao longo de todo o ano, e cuxo próximo fito terá lugar na praia de Area de Viveiro, coa participación de voluntarios do Espazo +60 en compañía de varios grupos de escolares e asociacións do terceiro sector.