Pasión Vega e o Dúo del Valle xuntos en Vigo

A voz cálida e chea de sentimento de Pasión Vega e o temperamental piano do Dúo del Valle únense para ofrecernos Dos Pianos con Pasión. Cartas desde Nueva York, un singular espectáculo que chega o 25 de xaneiro ao Centro Cultural Fundación Novacaixagalicia de Vigo.

 

As entradas xa están á venda a través de Servinova.

Aínda que proveñen de ámbitos moi diferentes da música, as traxectorias de Pasión Vega e os irmáns del Valle gozan do recoñecemento de crítica e público nos seus respectivos xéneros.

 

Por unha banda, Pasión Vega  é por todos coñecida. O seu inconfundible e elegante estilo á hora de interpretar un amplo abano musical, levouna a actuar nos principais escenarios do noso país e de América Latina.

 

Pola súa banda, o Dúo del Valle, unha das agrupacións camerísticas máis relevantes do panorama actual, mostra a vixencia e o valor da música culta a través das súas interpretacións sinceras e cargadas de emoción. A enerxía dos irmáns conquistou xa os teatros e auditorios máis importantes de Europa e Latinoamérica.

 

Con esa busca constante de novas maneiras de entenderen a música como nexo común, Pasión Vega e o Dúo del Valle xúntanse nun espectáculo que aposta pola fusión de ambos os estilos, ofrecéndonos a súa particular interpretación dun repertorio a medio camiño entre o clásico e o popular, baixo a dirección de Vanessa Rodríguez e cos arranxos musicais de Alberto Martín Díaz.

 

Un paseo polas músicas (clásica, jazz, fado, tango, copla...) e letras de países dos dous lados do Atlántico onde mesturan Manuel de Falla, Agustín Lara, Ernesto Halffter, Federico García Lorca, Manuel Infante, Santos Discépolo, Satie... Dos Pianos con Pasión. Cartas desde Nueva York tráenos, en fin, unha anovadora mestizaxe escénica e musical onde o clásico e o popular se fonden nunha evocadora e sorprendente viaxe.