PLANCTON. Limpeza do areeiro do Carreirón na Illa de Arousa
A partir de abril comezamos coas primeiras accións de limpeza de fondos e costas que está previsto facer ao longo de todo este ano na costa galega, dentro de noso programa PLANCTON. Esta iniciativa, enmarcada na estratexia de sustentabilidade de ABANCA e as nosas actividades de voluntariado ambiental, ten como obxectivo principal fomentar a conservación e a sustentabilidade das actividades socioeconómicas realizadas na área de influencia das Zonas de Especial Protección de Aves Mariñas de Galicia (ZEPA), Rede Natura 2000.
PLANCTON conta coa colaboración da Fundación Biodiversidade, do Ministerio para a Transición Ecolóxica e o Reto Demográfico, a través do Programa pleamar, cofinanciado polo FEMP, e complementaria ao proxecto LIFE-IP INTEMARES.
O vindeiro mércores 21 de abril e a pé de costa terá lugar a primeira das actuacións, unha actividade de limpeza que se desenvolverá asemade en diferentes enclaves da Illa de Arousa, como os areais que circundan o Parque Natural do Carreirón ou a praia do Vao. O noso equipo de Afundación, como parte fundamental da estratexia de sustentabilidade de ABANCA e das súas actividades de voluntariado ambiental, traballará conxuntamente coas mariscadoras da illa, alumnado e profesorado do Instituto Galego de Formación en Acuicultura (IGAFA) e do CEIP Torre Illa, así como voluntariado da Asociación Con Eles e da asociación de autismo Bata, entre outros. Todos eles serán os protagonistas desta gran xornada colaborativa de acción e concienciación ambiental.
O Carreirón (A Illa de Arousa)
Punta Carreirón atópase no extremo sur da Illa de Arousa. Este espazo natural está incluído polos seus valores naturais dentro da Zona de Especial Conservación (ZEC) “Complexo Ons-O Grove”, na Zona de Especial Protección para as Aves (ZEPA) “Complexo intermareal Umia-O Grove, A Lanzada, Punta Carreirón e Lagoa Bodeira” e Zonas de Especial Protección dos Valores Naturais, ademais de estar incluído dentro da Zona Ramsar “Complexo Intermareal Umia-O Grove”.
A zona de Punta Carreirón ten presenza de dunas mediofixas, dunas grises (hábitat prioritario) colonizadas por Pinus pinaster. Neste espazo natural pódese atopar lagarto verdinegro (Lacerta schreiberi) e culebra lisa meridional (Coronella girondica). A importancia deste espazo radica na gran cantidade de especies de aves limícolas que escollen esta zona para alimentarse e refuxiarse. Destacan o píldora cincenta (Pluvialis squatarola), o mazarico real (Numenius arquata), a gabita (Haematopus ostralegus), a mobella grande (Gavia immer), a mobella pequena (Gavia stellata) e a píllara real (Charadrius hiaticula), entre outras. Ata os anos 70-80 criaba o chorlitejo patinegro (Charadrius alexandrinus) nesta zona da illa, pero debido á presión humana, abandonaron esta zona de cría, aínda que se poden ver adultos. É unha zona onde se poden ver arroaces (Tursiops truncatus) achegarse á costa.