Voluntariado. Limpeza de areeiros na Illa de Cortegada

Esta iniciativa desenvóvese o sábado 29 de maio no Parque Nacional Marítimo Terrestre das Illas Atlánticas de Galicia: Illa de Cortegada. Un grupo de voluntariado de ABANCA e de Afundación procederemos á retirada de lixo e outros obxectos que poden chegar a ameazar a biodiversidade e os recursos dunha zona tan rica coma esta.

 

Arquipélago de Cortegada: Este conxunto de illas e illotes, de relevo moi chan, sitúase no interior da ría de Arousa, na desembocadura do río Ulla, de maneira que o seu carácter estuarino o mantén totalmente diferenciado das illas oceánicas do Parque. Esta situación, máis protexida da erosión mariña, fai que os seus fondos se recubran en maior medida de areas, moi aproveitadas polos habitantes da zona para  o cultivo de ameixa. No interior da illa de Cortegada mantense unha húmida formación boscosa de loureiros e outras árbores autóctonas que circundan a aldea abandoada e a súa ermida. Na illa Malveira Grande, que é zona de reserva, localízase un dos escasos bosques de cerquiños da costa atlántica en óptimas condicións.

 

Desde Afundación desenvolvemos dende o mes de abril as primeiras accións de limpeza de fondos e costas que ten previsto executar ao longo de todo este ano na costa galega, dentro do seu programa PLANCTON. Esta iniciativa, enmarcada na estratexia de sustentabilidade de ABANCA e as nosas actividades de voluntariado medioambiental, ten como obxectivo principal fomentar a conservación e a sustentabilidade das actividades socioeconómicas realizadas na área de influencia das Zonas de Especial Protección de Aves Mariñas de Galicia (ZEPA), Rede Natura 2000.

 

PLANCTON conta coa colaboración da Fundación Biodiversidade, do Ministerio para a Transición Ecolóxica e o Reto Demográfico, a través do Programa Pleamar, cofinanciado polo FEMP, e complementaria ao proxecto LIFE-IP INTEMARES.

 

INFÓRMATE AQUÍ sobre a programación completa de xuño como MES DO MEDIO AMBIENTE.