LIBRO DIXITAL Premio Afundación de Xornalismo Fernández del Riego

Xa está aquí o libro dixital do Premio Afundación de Xornalismo Fernández del Riego, que recolle todos os artigos gañadores desde o ano 2004 ao 2024. Unha extensa e destacada nómina de xornalistas e escritores/as figuran neste volume coas publicacións que ao longo dos últimos 20 anos se erixiron co Premio Afundación. Nel podes ler Fina Casalderrey, Santiago Jaureguízar, Inma López Silva, Manuel Bragado, Rosa Aneiros, Miguel-Anxo Murado e unha longa listaxe de grandes creadores e creadoras galegas que analizan diferentes temáticas desde prismas diversos.  

 

Descárgao xa AQUÍ.

 

PREMIO AFUNDACIÓN DE XORNALISMO FERNÁNDEZ DEL RIEGO

A figura de Francisco Fernández del Riego reúne as características esenciais que inspiran esta convocatoria: identidade coa lingua galega, espírito aberto e universal, compromiso ético e presenza activa no xornalismo. Homenaxeamos a súa figura e, a través deste premio que leva o seu nome, facemos extensiva a homenaxe a escritoras, escritores e xornalistas que contribúen decote á construción do discurso cívico en Galicia.

O premio está dotado con 10 000 euros e 2.000 para as persoas finalistas. Entre os gañadores podemos sinalar nomes tan importantes como Fina Casalderrey, Carlos G. Reigosa, Rosa Aneiros, Manuel Rivas, Manuel Bragado, Luís Pousa, Ramón Loureiro, Tamara Montero, Miguel Anxo Murado, Inma López Silva, Cristina Pato, Míriam Ferradáns, Francisco Castro ou Mar Mato, gañadora da última edición.

 

Descubre as recentes finalistas que optan a levar o XXII Premio este 2025. 

 

FRANCISCO FERNÁNDEZ DEL RIEGO (Vilanova de Lourenzá, 1913 – Vigo, 2010)

Foi unha das figuras máis queridas e significativas da cultura galega do noso tempo. Ensaísta, narrador, editor e xornalista, pertenceu á promoción de intelectuais que xurdiron ao abeiro do Grupo Nós e o Seminario de Estudos Galegos. A súa longa obra foi un servizo permanente a Galicia, comprometido cos seus procesos de modernización e reconstrución da súa identidade cultural e política.

Foi membro do Partido Galeguista e das Mocidades Galeguistas, animador dos programas en lingua galega na BBC, cofundador da Editorial Galaxia e codirector da revista Grial. Colaborou en moi diversas publicacións periódicas, dentro e fóra de Galicia, e ata finais de 2009 foi director da Biblioteca da Fundación Penzol. Doou a súa obra e o seu patrimonio intelectual á cidade de Vigo, onde residiu desde o ano 1940.

 

Aproveita para visitares a axenda web e decatáreste de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte doutras actividades escénicas.