Xogos educativos LETRAS GALEGAS 2024
Desde Afundación, Obra Social ABANCA, presentamos coma cada ano polo Día das Letras Galegas un proxecto de carácter educativo para achegar, neste caso, a obra de Luísa Villalta a todas as nenas e nenos e tamén ao resto do público. Un xeito ameno e divertido de coñecer un pouco máis a fondo a nosa escritora homenaxeada este 17 de maio de 2024. Grandes e pequenos/as poderán brincar e saber dela a través dun conto interactivo e tres rodas de letras para diferentes idades.
Luísa Villalta é coñecida sobre todo pola súa faceta poética, aínda que é unha das grandes das nosas letras contemporáneas, con obra narrativa, desde novela a ensaio ou teatro. Ademais de escritora, a coruñesa tamén foi música e activista, o seu labor en favor da cultura galega realizouno non só a través da escrita, se non tamén como colaboradora en diferentes diarios, así coma cun activo compromiso social e político.
CONTO INTERACTIVO | Para público infantil e primeiros cursos de primaria.
As familias e o profesorado poderán ler e, á vez, se o desexan, xogar con el.
Para a ocasión, realizouse un texto inicial que pretende ser apoio e axuda á comunidade escolar, buscando a través do xogo, superar os problemas de comprensión lectora.
O conto pretende presentar de maneira sinxela e comprensible a Luísa Villalta, adaptando a súa poesía aos e ás máis pequenas, escollendo como tema a fusión da música e a poesía, un argumento moi presente na autora. Como ela defendía, a poesía é música, e a música, poesía. Desde os tempos das Cantigas de Amigo ata a súa época, a poesía na nosa lingua soáballe a “muiñeira vella”, como dicía do caso da obra de Rosalía de Castro.
Os xogos propostos ao longo do conto son sinxelos retos de vogais con algunha audición, cos que pretendemos ofrecer un xeito amable de se encontrar coas letras e as palabras.
Queres xogar? Entra aquí!
RODAS DE LETRAS
- 4º a 6º de Educación Primaria, 1º e 2º de ESO | Entra aquí
- 3º e 4º de ESO, bacharelato e CF | Entra aquí
- Público xeral | Entra aquí
As rodas, cada unha no seu nivel, son un percorrido pola vida e obra desta escritora; a súa paixón pola música, o ensino e a escritura. O seu activismo social e a súa loita, e a súa colaboración coas artes plásticas, son algúns dos fitos a descubrir nestas rodas de letras.
Entra aquí para ver todas as propostas!
