HÁBITATS. NATUREZA ESTENDIDA, na Coruña

HÁBITATS. NATUREZA ESTENDIDA xa está na Sede Afundación A Coruña. Unha experiencia sensorial inmersiva coa que te convidamos, canda a Fundación Cidade da Cultura e a Xunta de Galicia, a explorar a diversidade dos ecosistemas do planeta Terra, percorrendo os cinco continentes a través dunha viaxe dixital fascinante. Coñece esta proposta innovadora que fusiona os mundos físico e dixital, permitindo estar en oito destinos únicos, grazas ás tecnoloxías de realidade virtual (VR) e realidade aumentada (AR), interactuando con espazos, animais e plantas cun nivel de detalle asombroso. Agardámoste na cidade herculina.

 

ENTRADAS

Entradas á venda a través de Ataquilla e na Sede Afundación A Coruña.

Prezo | 3,50 € (gastos de xestión incluídos)

Se pertences a un centro escolar, contacta coa Área Educativa de Afundación a través do correo electrónico areaeducativacoruna@afundacion.org ou no 981 18 65 49. Consulta as datas dispoñibles e reserva unha visita para o teu alumnado (desde 4º PRIMARIA ata BACH e CF).

 

Non poderá acceder a esta actividade o público menor de 6 anos de idade. Os/as menores de 12 anos deberán realizar a experiencia na compaña dunha persoa adulta responsable, e entre 6 e 8 anos deberán realizar a actividade da man da persoa adulta responsable.

 

CULTURA POR ALIMENTOS convídate a traeres a túa doazón de alimentos non perecedoiros para axudar os bancos de alimentos locais. Infórmate!

 

Hábitats. Natureza estendida lévanos desde o deserto de Sonora en Estados Unidos á Gran barreira de coral australiana, ou desde o Mar de Weddell na Antártida á Cova de Ceza no Courel, entre outros. Atoparemos na nosa aventura elefantes, osos, tartarugas, baleas, cágados e moitas outras especies ás que teremos o privilexio de observar de preto nos seus propios hábitats, grazas ás lentes de realidade virtual.

A instalación está aberta do 24 de abril ao 13 de setembro de 2025, de luns a sábado (festivos incluídos). Cada sesión ten unha duración aproximada de 30 minutos.

Esta actividade, coorganizada entre Afundación, Obra Social ABANCA e a Xunta de Galicia a través da Fundación Cidade da Cultura, foi conceptualizada e desenvolvida por Carlos Seijo, director do estudo galego Maxina.

 

Carlos Seijo - Maxina

Carlos Seijo (A Coruña, 1980) é un artista audiovisual galego cunha traxectoria que nace da estética e os gráficos xerados por computador para fusionarse, nos seus últimos proxectos, coas tecnoloxías emerxentes de realidade estendida e virtual. Na actualidade, dirixe o estudo galego Maxina, fundado xunto coa súa irmá Noela Seijo e especializado en efectos visuais, animación 3D e contidos inmersivos.

En Maxina realiza proxectos para institucións e empresas galegas e españolas próximas á ciencia, a arte, a innovación e a cultura, como Afundación, Netflix, Ferrovial, Xunta de Galicia ou o Guggenheim de Bilbao, entre outras. Con Ondas do sur, consegue o recoñecemento internacional como finalista dos Hollywood Music Awards 2015. O seu interese hoxe en día céntrase na creación de experiencias inmersivas enfocadas ao espazo museístico, cunha pulsión creativa moi ligada ás tecnoloxías de realidade virtual e mixta e á intelixencia artificial.

 

INFORMACIÓN PRÁCTICA

• Prohibido o acceso a menores de 6 anos. Menores de 12 anos, cunha persoa adulta responsable que deberá adquirir tamén unha entrada; menores de 8 anos, deberán realizar a actividade da man dunha persoa adulta.
• As persoas visitantes deben chegar 5 minutos antes da hora da reserva.
• Non se recomenda a entrada a persoas con claustrofobia, vertixe, enfermidades cardíacas, antecedentes de convulsións ou sensibilidade de luces.
• A instalación é accesible para persoas con mobilidade reducida.
• Adoptamos un meticuloso protocolo de medidas de hixiene: todo o equipo se desinfecta coidadosamente para brindar unha esterilización eficiente entre cada visitante.
• Debido ao emprego de tecnoloxía avanzada, a instalación pode requirir un mantemento non planificado que pode dar lugar a atrasos ou cancelacións.
• A actividade reprodúcese en bucle, cando volva ver a escena inicial, dáse por terminada a experiencia. A duración aproximada é de 30 minutos.

 

Actividade coorganizada entre Afundación, Obra Social ABANCA, Fundación Cidade da Cultura e Xunta de Galicia.

 

Aproveita para visitares a axenda web e decatáreste de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte doutras actividades escénicas.