Faladoiro virtual A VIDA LENTA, con ÓLIVER LAXE e conducido por Aser Álvarez en AfundaciónTV

No vindeiro mes de maio tes uns faladoiros virtuais en Afundación TV co gallo da mostra A VIDA LENTA [+ INFO] e guiados polo seu coordinador, Aser Álvarez.

 

Acompañaranos:

ÓLIVER LAXE | 14 MAI | 18.00 h

Desde a mesma sala onde amosamos a exposición en Vigo, falaranos o recoñecido director de cinema.

Medra entre Francia, España e Marrocos. As súas dúas primeiras longametraxes son premiadas no Festival de Cannes: Todos vós sodes capitáns recibe, entre outros, o Premio da Crítica Internacional na Quinzaine des Réalisateurs en 2010, e Mimosas acada o Gran Premio da Semaine de la Critique en 2016. En 2019 fai historia ao converterse, canda Víctor Erice, no primeiro cineasta español seleccionado en Cannes coas súas tres primeiras obras, e no único en ser premiado en todas as súas participacións. O que arde recibe o Premio do Xurado da sección oficial Un Certain Regard de Cannes, o Premio á Mellor Creación Sonora da sección e compite nos festivais internacionais máis importantes da tempada, como San Sebastián, Toronto, Tokio, Londres, Melbourne, Mar del Plata ou Nova York, gañando numerosos premios. O que arde é tamén candidata aos Premios Goya en catro categorías: Mellor Filme, Mellor Director, Mellor Actriz Revelación e Mellor Fotografía, acadando estes dous últimos. Actualmente, Óliver está a traballar nun centro de desenvolvemento rural na aldea lucense onde filmou O que arde, de onde é orixinaria a súa familia. O compromiso que manifesta co rural está a ser un auténtico empurre para moitos proxectos dos Ancares, aos que Óliver deu visibilidade e apoio.

 

Tamén estarán: 

OLGA NOVO e XOANA ALMAR | 26 MAI | 19.00 h
Desde as súas casas, as dúas mulleres falarán sobre a súa necesidade de conectar coa aldea. 
+INFO

 

A VIDA LENTA [+ INFO] é un proxecto que, a través da exposición presencial e das actividades paralelas en liña, pretende divulgar diferentes visións do rural que nos axuden a entendelo desde parámetros contemporáneos, para enriquecer e actualizar o discurso, iconografía e expectativas.

O rural acostuma asociarse, a miúdo univocamente, cos valores da tradición, da humildade, do esforzo e da cultura popular folclórica. A forza desta proposta reside en aprendermos que o rural tamén significa inspiración contemporánea, vangarda, compromiso e fervedoiro de creatividade.

O fío condutor destes dous faladoiros é precisamente o rural, comprobando que a proposta actual baixo este lema é variadísma e denota unha presenza actual crecente, que recollemos con inspiradores representantes de diferentes ámbitos: cinema, poesía e muralismo.

Desde Afundación temos a convicción de que divulgar desde o compromiso coa diversidade é o único xeito de podermos entender o mundo, cada vez máis plural e preciso de maior respecto e empatía. Estes encontros ilustran a diversidade rural, creativa e cultural que atopamos no país.