Exposición «Antón Pulido. Antolóxica» en Vigo
O 25 de setembro inaugúrase a mostra antolóxica de Antón Pulido no Centro Cultural Afundación de Vigo, coa colaboración da Consellería de Cultura da Xunta de Galicia. A exposición estará aberta ata o 22 de novembro de 2014 en horario de luns a venres de 17.30 a 20.30 h e sábados de 11.00 a 14.00 e de 17.30 a 20.30 h.
«Antón Pulido. Antolóxica» percorre a vida e obra do singular pintor. Nacido nunha pequena aldea de Ourense en 1944, hoxe en día sitúase como un dos artistas galegos máis influentes e destacados do momento. Pulido está avalado por unha traxectoria artística que levou a súa obra desde Toquio ata Nova York.
O seu traballo está centrado nunha investigación plástica que dialoga coa tradición. Así, o artista ourensán segue as indagacións dunha parte das correntes artísticas das últimas décadas, equidistante entre as tendencias puramente formalistas e as máis viradas cara a posicións máis expresivas e expansivas. Nas súas creacións, como nunha parte da arte moderna, a pintura semella retroceder sobre si mesma e reconsiderar os seus principios fundamentais, dando énfase á valoración autónoma de materia, figura e cor.
Vídeo da inauguración da exposición
Coa finalidade de achegar ao gran público a vida e obra de Antón Pulido, Afundación ofrece visitas guiadas e mais un programa de actividades deseñado para escolares:
«Vexo, vexo... Ti que ves?»
Visita obradoiro para educación infantil e 1º ciclo de educación primaria
Aprende a observar e xoga buscando as cores, as sensacións, as formas e as persoas. E non esquezas pintar!
«As obras de arte tamén se fan preguntas»
Visita obradoiro para 2º e 3º ciclo de educación primaria e ESO
Déixate levar polas sensacións, as cores e as escenas de Antón Pulido e descobre os múltiples interrogantes que pode agochar unha obra de arte.
«Antón Pulido. Antoloxía»
Visita comentada para bacharelato e CF
Atravesa a vida e obra de Antón Pulido nun diálogo entre a actualidade e as vangardas históricas. Con posibilidade de realizar un obradoiro de pintura.
Prezo por persoa: 1 €
Reserva de praza no 986 129 032