Mostra «Múltiple. A arte do gravado de Picasso a Barceló». Vilagarcía de Arousa

Do 19 de xuño ao 24 de xullo podes desfrutar en Vilagarcía de Arousa dun dos proxectos expositivos máis destacados e suxestivos da Colección de Arte Afundación. Referentes internacionais da arte reúnense nesta mostra titulada «Múltiple. A arte do gravado de Picasso a Barceló», onde podemos atopar obras de artistas coma os citados, ademais de Dalí ou Miró. 

Gústache a arte? esta é unha oportunidade que non podes perder. Convidámoste a gozares de obras extraordinarias con esta itinerancia inserida no programa Corrente Cultural, con que pretendemos levar a Colección de Arte Afundación e outras opcións artísticas a todos os recunchos de Galicia. 

 

Sala Antón Rivas Briones

Rúa Alcalde Rey Daviña, 14-16

Vilagarcía de Arousa

 

Medidas COVID-19

A capacidade da sala é agora de 95 persoas; quen visiten as instalacións deberán gardar a distancia interpersoal de 1,5 metros en todo momento e, anque o uso da máscara é recomendable, no caso de non poder manter a debida separación, pasaría a ser obrigatorio.

 

CONTIDOS da mostra

Esta exposición, composta por 52 obras gráficas seleccionadas entre os fondos da Colección de Arte Aundación, permítenos coñecer mellor a obra dalgúns dos mestres da arte española do século XX, entre os cales sobresaen tres grandes xenios internacionais da pintura e que o foron tamén da arte da estampa: Salvador Dalí, Pablo Picasso e Joan Miró.

 

Despois da Guerra Civil, a primeira manifestación do espírito renovador da arte xorde vinculada ás estampas editadas nas edicións de La Rosa Vera. Entre os artistas ligados á renovación destacan Joaquín Sunyer, Albert Ràfols Casamada, Guinovart ou José Caballero. Na publicación Estampas de la Cometa aparecen os traballos dos grandes mestres Antonio Saura, Eduardo Chillida ou Hernández Pijuán. A esta actividade interior habería que acrecentar a de tres artistas que traballan no exilio: Antonio Rodríguez Luna, Antoni Clavé e Luís Seoane. Ademais, para valorar o panorama calcográfico do século XX, é imprescindible coñecer tamén o papel do grupo vangardista Dau al Set, onde sobresae Tàpies.

 

Con esta mostra, para alén de nos enmarcar no panorama da época, descubriremos como as distintas técnicas de gravado, a litografía e a serigrafía reivindican o seu valor técnico e estético e se diferencian así do resto das manifestacións artísticas.

 

Esta mostra encádrase dentro do proxecto CORRENTE CULTURAL, unha aposta de ABANCA e Afundación para espallar cultura por toda Galicia, polos diferentes concellos e contando coa súa colaboración, construíndo unha rede de calidade que leve novas propostas máis alá dos nosos edificios. As iniciativas que conforman este ciclo parten dunha produción de nivel, cun interese específico para a comunidade e unha estreita vinculación coas nosas tradicións e historia.