Mostra «Métrica y espiritualidad. Obras de José Antonio Miguez». Ourense
Do 12 de setembro ao 20 de outubro podes ver a exposición «Métrica y espiritualidad. Obras de José Antonio Miguez» na Sala de Exposicións Afundación de Ourense. Estamos perante unha secuencia de obras realizadas por computador coas que o artista desenvolve composicións xeométricas para establecer unha equivalencia entre a experiencia de paz e a expresión da beleza. Comisariada por Adolfo Wilson.
Desde as súas mesmas orixes, José Antonio Miguez asumiu a creación artística como unha experiencia mística e espiritual; coma unha forma de revelación interior e autocoñecemento, capaz de ofrecer unha interpretación á súa particular visión do mundo e ao sentido mesmo da existencia. As súas primeiras composicións, concibidas en certa maneira coma mandalas, estaban animadas por un compoñente lúdico e expresaban significados simbólicos. Posteriormente, a súa formación profesional, ligada ás ciencias exactas, condúceo ao desenvolvemento dunha investigación persoal ao redor da procura da expresión da beleza. É así como, a través da súa identificación do concepto de harmonía e proporción coa noción de equilibrio espiritual, o artista redescobre e aprópiase con fins creativos, dunha das fontes máis antigas da esencia mesma da beleza: a chamada sucesión ou serie de Fibonacci. Miguez desenvolve composicións xeométricas utilizando esta serie como punto de partida para establecer unha equivalencia entre a experiencia de paz e a expresión da beleza. E basea a súa investigación plástica na idea da preexistencia dun sentido da harmonía, da beleza que transcende o intelectual e o cultural, que traduce nos seus traballos a través da busca da maior simplicidade discursiva posible, fomentando o silencio visual e a correspondencia entre a rítmica musical e a sonoridade das formas.
Utilizando o computador como ferramenta artística, Miguez ofrécenos visións alusivas ao micro e ao macrocosmos; bríndanos referencias ao principio de dualidade manifesto a través dos opostos no universo, coma o Ying e o Yang, a claridade e a escuridade, o branco e o negro; crea composicións dotadas de dinamismo e movemento virtual, onde figura e fondo interactúan alternando os seus roles, e as formas, expostas a tensións visuais, parecesen estar a piques de mutar.
O ARTISTA
Nace en Ourense en 1957. Realiza estudos no Instituto Universitario de Tecnoloxía, Rexión Capital, Caracas; na Université de Caen, Francia; na Universidade Santa María, Caracas (onde obtén o título de Economista); e en The American Graduate School of International Management, Phoenix, Arizona (onde obtén un Master en International Manager).
De formación artística autodidacta, en 2016 dá inicio a unha serie de debuxos en grafito sobre papel co tema de mandalas, nunha procura expresiva do pensamento oriental, a filosofía zen e a noción de chacras. Posteriormente, introduce a cor nos seus debuxos mediante o uso de rotuladores, e incorpora neles elementos lúdicos, como sorrisos e corazóns, e motivos orgánicos e vexetais. Un ano máis tarde, articula o tema musical aos seus traballos, facendo alusión a teclados de pianos proxectados dentro dun plano circular. Pouco despois, experimenta coa pintura acrílica, orientando o seu temario a formas xeométricas, conos virtuais e figuras concéntricas. A finais de 2017, comeza a desenvolver as súas composicións co concurso do computador e de programas dixitais, enfocando a súa investigación ao redor dun vocabulario esencialmente construtivista. En 2018, participa na exposición colectiva «Arte sensorial. Geometría y cinetismo en Latinoamérica», na Galería Odalys, en Madrid.
