Mostra «Fotografía Contemporánea Colección Telefónica». A Coruña
Podes gozar desta exposición durante todo o verán na Sede Afundación da Coruña. Aproveita os paseos estivais polo Cantón Grande para te adentrares no noso edificio e admirar obras incribles da historia da fotografía de autores como Baldessari ou Bernd e Hilla Becher. Abre ben os ollos e queda con cada detalle destas espectaculares imaxes que marcaron un fito no concepto da fotografía, pasando a considerarse arte. Do 10 de xullo ao 21 de setembro, o noso edificio da Coruña abre as súas portas a «Fotografía Contemporánea Colección Telefónica». Estás convidad@.
Visitas comentadas, de balde e sen necesidade de inscrición, os mércores e venres ás 19h.
O fondo de fotografía contemporánea da Colección Telefónica céntrase nun período chave na historia deste medio, o que vai desde finais dos anos setenta a principios do século XXI. Uns anos de profundo cambio na forma de concibir o uso da fotografía no ámbito artístico e que determinou a súa incorporación definitiva aos circuítos da arte.
Algúns museos americanos empezaron a coleccionar fotografía a comezos dos anos trinta do século XX, e tampouco faltaron críticos e historiadores da arte que prestasen atención ao fotográfico antes dos setenta, mais tanto a práctica da fotografía artística coma a súa difusión eran limitadas fronte ao seu uso dominante, relacionado coa imprenta e os medios de comunicación. Xornais, revistas ilustradas e libros eran o soporte tradicional en que as fotografías chegaban ao gran público. Todo iso comezou a cambiar co uso do soporte fotográfico por parte dalgúns artistas pop, coma o propio Andy Warhol, ou os conceptuais, como Ed Ruscha. O salto deuse coa aparición dunha nova xeración de artistas que utilizaban para as súas creacións o soporte fotográfico e que concibían a súa presentación non como páxinas impresas dun libro ou revista, senón como ampliacións, enmarcadas, que reclamaban a mesma forma de contemplación ca un cadro.
A exposición ilustra na segunda planta este momento de transición e ten precisamente como punto de partida os traballos apropiacionistas dos americanos Richard Prince, John Baldessari ou Sherrie Levine, seguidos a continuación doutros artistas que a través das súas fotografías reflexionan sobre a construción da imaxe, o corpo, a identidade de xénero, ou un novo modo de facer documentalismo. Fronte a esta liña de traballo, no andar tres, sitúase como eixo fundamental a fotografía da Escola de Düsseldorf, con Bernd e Hilla Becher á cabeza e os diferentes camiños percorridos por algúns dos nomes máis importantes da fotografía contemporánea actual.
