Exposición: Destino. Unha peregrinación de Manuel Valcárcel. Xinzo de Limia

ABANCA, Afundación e o Concello de Xinzo de Limia presentan a exposición Destino. Unha peregrinación de Manuel Valcárcel, unha proposta fotográfica que convida a reflexionar sobre o significado da viaxe como experiencia vital e transformadora.

A mostra reúne catro peregrinacións realizadas en catro países de distintos continentes —O Tíbet, Senegal, México e Galicia— e toma a fotografía documental como ferramenta narrativa para contar historias humanas vencelladas por un mesmo sino. A través de imaxes cheas de emoción, cor e vida, Valcárcel aborda cuestións universais como a familia, a emigración, o envellecemento, a sostibilidade e o concepto de fogar.

Destino forma parte do programa Corrente cultural, unha iniciativa que percorre Galicia grazas á colaboración entre ABANCA, Afundación e distintos concellos, achegando propostas culturais de calidade a diferentes localidades.