Exposición OS PARQUES NACIONAIS DE ESPAÑA, en Vigo

O territorio español conta co privilexio de albergar 16 Parques Nacionais, cada un deles único, singular e cunha personalidade propia. Xuntos conforman a Rede de Parques Nacionais, un sistema esencial para preservar a riqueza natural que define a nosa identidade peninsular e insular. Estes espazos non só protexen paisaxes excepcionais, senón tamén as nosas raíces culturais, históricas e sociais. A mostra OS PARQUES NACIONAIS DE ESPAÑA recólleos todos a través das fotografías gañadoras e finalistas do concurso FOTOPARQUES 2023, onde artistas e amantes da natureza inmortalizan a beleza e singularidade destes espazos protexidos. A través de 93 imaxes, acompañadas de textos divulgativos, a exposición busca difundir a importancia dos Parques Nacionais, promover a conservación dos nosos ecosistemas e inspirar a sostibilidade e o respecto polo medio ambiente. Ata o 30 de setembro pasea pola Rúa Príncipe en Vigo e descubre esta coidada colección de fotografías.

 
Desde 1918, cando se declararon os primeiros Parques Nacionais —Picos de Europa (entón Montaña de Covadonga) e Ordesa e Monte Perdido—, España foi pioneira na protección do seu patrimonio natural. Máis dun século de esforzo colectivo permitiu salvagardar ecosistemas únicos, biodiversidade irrepetible e paisaxes que narran a nosa historia, asegurando o seu goce e pervivencia para as xeracións futuras.

 
Desde os cumes de Sierra de Guadarrama e os lagos de Aigüestortes, ata os humidais de Doñana e os bosques mediterráneos de Cabañeros, os nosos parques son un reflexo da extraordinaria variedade xeográfica e ecolóxica de España.

• Paisaxes de montaña: Picos de Europa, Ordesa, Aigüestortes, Serra Nevada.
• Humidais e bosques: Tablas de Daimiel, Monfragüe.
• Ecosistemas mariños: Illas Atlánticas de Galicia, Arquipélago de Cabrera.
• Volcáns e laurisilva: Timanfaya, Teide, Garajonay, Caldera de Taburiente.
• O máis recente: Serra das Neves (2021), un tesouro botánico en Málaga.

 

Esta mostra invítanos a mergullarnos na súa beleza a través do obxectivo de múltiples artistas que inmortalizaron as nosas paisaxes naturais a través do certame nacional FOTOPARQUES. Unha colección de magníficas instantáneas que poñen de manifesto a singularidade dos espazos que conforman a Rede de Parques Nacionais. Estas imaxes serven de altavoz para unha mensaxe de sostibilidade e conservación dos ecosistemas máis salientables do noso país, perante a evidente vulnerabilidade que amosan, xunto ás súas especies, e que espertan unha preocupación medioambiental cada vez maior.

Todo isto transmítese cunha visión esperanzadora, poñendo en valor as accións positivas que se están a realizar e sinalando o camiño a percorrer para garantir a preservación dos ecosistemas, base para a supervivencia da nosa fauna e flora autóctonas.

 
A mostra está organizada por Afundación e o OAPN (Organismo Autónomo Parques Nacionais) e conta coa colaboración de TRAGSA, o Concello de Vigo e realizada por Lunwerg.

 

Ven descubrir, aprender e marabillarte coas paisaxes que nos definen. Porque protexelas é preservar o noso futuro.

 

(Exposición apoiada polo Ministerio para a Transición Ecolóxica e o Reto Demográfico).