Exposición SACRIFICIO E ASCENSIÓN. 15 ANOS DE CÓMIC DE DAVID RUBÍN Ourense
Debido ás novas restricións pola COVID, as nosas salas de exposicións permanecerán pechadas até novo aviso.
SACRIFICIO E ASCENSIÓN. 15 ANOS DE CÓMICS DE DAVID RUBÍN, unha mostra que percorre con espírito antolóxico as diferentes etapas, influencias e series desta gran figura da ilustración, partindo dos seus primeiros traballos en Galicia para acabar cos últimos no esixente mercado americano. David Rubín (Ourense, 1977) é un dos historietistas españois máis recoñecidos nos últimos anos. É cofundador do colectivo Polaqia, formado por historietistas de Galicia e recoñecido con varias candidaturas aos pretixiosos premios Eisner. Desde uns duros comezos en que o cómic era unha paixón, máis ca un traballo, ata o momento actual, en que deviu nun dos historietistas máis solicitados do panorama internacional, esta é a exposición máis extensa, completa e ambiciosa das realizadas sobre este autor, con máis de 230 obras, en que se reflicten todos os seus fitos creativos.
Na súa primeira etapa como profesional destacan títulos como La tetería del oso malayo ou Cuaderno de tormentas; mais non é ata El Héroe, cando consegue o éxito nacional e internacional, xa que se publica no estranxeiro, abríndolle a porta a outros mercados. Ségueo Beowulf, outra obra sobresaínte que o confirma coma un dos autores fundamentais do panorama actual. Comeza así a traballar para o mercado americano en series coma Aurora West, La Ficción, Ether ou Sherlock- Frankenstein, combinando os devaditos traballos con outros realizados directamente para o mercado español, como Gran Hotel Abismo ou Fuego, o seu último proxecto aínda en desenvolvemento, que verá a luz en 2021 da man da editorial Astiberri.
Da man desta exposición, Afundación converteuse en pioneira na aplicación de tecnoloxía de Realidade Aumentada tanto na propia sala de exposicións coma na visita virtual albergada aquí. Esta tecnoloxía permite que, quen visita a sala en presencial ou en virtual, acceda a contidos extras a través do seu dispositivo móbil: descrición de personaxes, proceso creativo, bosquexos, e moitas máis sorpresas que chegan ao visitante a través da AR (Augmented Reality) deseñada para varias obras da exposición. Con esta aplicación, Afundación promove que as visitas ás salas de exposicións sexan unha experiencia con que descubrir moito máis do que parece exposto e que esta información sexa ademais accesible desde calquera lugar do mundo con conexión a Internet.
Exposición comisariada por Asier Mensuro.
INFORMACIÓN COMPLEMENTARIA:
Sacrificio e ascensión. O documental de David Rubín. Con coloquio previo entre Santiago Segura, David Rubín e Asier Mensuro. AQUÍ
Visita virtual con Realidade Aumentada. Un percorrido virtual pola sala de exposicións con posibilidade adicional de descargar a app para Android ou iOS que permite acceder ao material extra en Realidade Aumentada. AQUÍ
Time lapse de David Rubín, creando o mural que se pode ver na sala de exposicións:
Tráiler da exposición:
Actividades deseñadas para escolares:
Eu de maior quero ser… Visita conto con taller. Infantil a 3º de primaria
Superlapis, o heroe que debuxou para salvar o mundo. Visita taller. 4º de primaria a 2º
de ESO
Sacrificio e ascensión. 15 anos de cómics de David Rubín. Visita taller. 3º e 4º de ESO,
bacharelato e CF
Exposición con todas as medidas de seguridade pertinentes para que poidas gozar da cultura e a arte como o fixeches sempre.
MEDIDAS DE PREVENCIÓN COVID
-Uso obrigatorio de máscara
-Control de capacidade
-Itinerarios e percorridos marcados para fluidez de público
-Xel hidroalcohólico en múltiples puntos dos edificios e salas
-Desinfección rigorosa de espazos
-Substitución de elementos táctiles e de man (pantalla, interactivos, folletos) por outros que non
requiren contacto físico
-Supervisión en sala por parte de persoal para cumprimento da distancia de seguridade
