Exposición COMEDY WILDLIFE, en Ourense
Agora chega a Ourense a exposición máis aclamada polo público en diferentes cidades europeas, e que arrasou o pasado ano en Vigo e Ferrol. COMEDY WILDLIFE aterra o 13 de febreiro na Sala de Exposicións Afundación Ourense para amosarnos a cara máis divertida da vida salvaxe. A través das fotografías seleccionadas no recoñecido Premio Comedy Wildlife Photo, dos anos 2015 a 2022, a mostra fai gala dunha magnífica colección de imaxes de natureza cunha singularidade: diferentes especies animais conectan co ser humano a través das emocións. Moitas das fotos sacaranche un sorrixo, e mesmo algunha te fará rir a escachar.
Vena descubrir ata o 11 de maio de 2025.
Exposición recomendada para familias!
VISITA GUIADA INAUGURAL | 13 FEB | 19.00 h
A cargo do Servizo Didáctico Afundación. Apúntate aquí.
Esta mostra enmárcase no programa solidario CULTURA POR ALIMENTOS, en colaboración con FESBAL. Convidámoste a colaborares con alimentos non perecedoiros que podes depositar no acceso ao edificio, e que serán destinados aos bancos de alimentos locais. Grazas!
ACTIVIDADES ESCOLARES
- INFANTIL a 4º PRIMARIA | Visita conto con obradoiro | "Comediantes da vida salvaxe"
- 5º PRIMARIA a 2º ESO | Visita obradoiro | "Sostibilidade e tecnoloxía para preservar o sorriso da vida salvaxe"
- 3º e 4º ESO, BACHARELATO, CICLOS FORMATIVOS | Visita comentada con obradoiro opcional | "The Comedy Wildlife"
Prezo 2 €/escolar
Inscricións no enderezo electrónico areaeducativaourense@afundacion.org ou no 988 391 746
A EXPOSICIÓN
Sesenta fotografías son as que compoñen a exposición homónima, «Comedy Wildlife», do certame internacional. As imaxes foron realizadas en distintos recunchos de todos os continentes e todas elas resultaron seleccionadas entre 2015 e 2022 como as mellores instantáneas de animais feitas en clave de diversión e humor no mundo, grazas á colaboración entre Afundación e Terra Espléndida e tras abarrotar en 2023 museos e centros de exposicións dos Países Baixos, Inglaterra, Portugal ou Canadá.
Evitar as mensaxes e as imaxes «deprimentes» é o que busca este certame, e con el a exposición. Isto é o que asegura o cofundador dos premios The Comedy Wildlife, o tamén fotógrafo especializado na natureza Paul Joynson-Hicks, que «as cuestións de conservación e sustentabilidade da vida silvestre están a gañar impulso a nivel mundial, pero as mensaxes e as imaxes tenden a ser negativas, deprimentes e enervantes». E que por iso se animou, xunto aos fotógrafos de natureza Tom Sullam e Michelle Wood, a crear estes galardóns. Desde 2015, premian as imaxes máis divertidas de animais tomadas nun mundo «extraordinariamente belo e interconectado».
«Comedy Wildlife» é unha exposición que cativa toda a familia ao utilizar o humor e a sorpresa como unha forma efectiva de involucrar no encanto do reino animal. As imaxes son extremadamente populares, atraen todas as idades e transcenden todas as culturas e idiomas. Así, as 60 instantáneas seleccionadas que se presentan en Vigo mostran, nas posicións e momentos máis divertidos, a animais como tartarugas, mapaches, osos, pingüíns, etc.
Unha foto divertida de animais é incriblemente eficaz porque non hai barreiras para a comprensión, ou tabús que deben ser negociados. A imaxe aproveita o impulso polo antropomorfismo, que está ben documentado como un dos disparadores máis potentes para a empatía humana. Para entender realmente os animais e as cuestións que lles afectan temos que empatizar con eles como concidadáns do mesmo planeta.
Aproveita para visitares a axenda web e decatarte de todas as propostas culturais que che ofrecemos ao longo do mes! Tamén podes entrar na nosa ticketeira Ataquilla.com para outras actividades escénicas.
