Exposición UNHA VIAXE SOLIDARIA E CREATIVA CARA Á VIDA, na Coruña
Ven á exposición na Sede Afundación A Coruña, no terceiro andar, de Tierra de Hombres UNHA VIAXE SOLIDARIA E CREATIVA CARA Á VIDA. Podes visitala e facerte con obra de artistas galegas e galegos, mentres colaboras cunha causa social. Do 31 de maio ao 22 de xuño do 2024.
Hai sete anos, desde Tierra de Hombres, unha serie de artistas embarcaron neste marabilloso proxecto de solidariedade, dirixido por Celestino Poza Domínguez. As e os artistas galegos, sempre sensibles a todo o que os rodea, con xenerosidade e entusiasmo de cara ao proxecto, transformaron os seus tecidos en velas. E foi tal a súa enerxía, a calor e a cor que puxeron, que o vento soprou ao seu favor, conseguindo que un gran público de apoio embarcase canda elas e eles. Entón, e grazas á xenerosidade de todas e todos, chegamos ao porto desexado. Outro ano máis imos vivir unha nova aventura, da man de Francis Marrouch e Pedro Bueno. Convidámosvos a facer esta viaxe solidaria e que nos acompañedes por este camiño cheo de luz.
A Fundación Tierra de Hombres España creouse en 1994, cuxa delegación en Galicia comezou as súas actividades no ano 2003, dentro do Movemento Internacional Terre des hommes, orixinado en Lausanne (Suíza) en 1960 e formando parte da Federación Internacional Tierra de hombres, segunda agrupación mundial da ONGD de atención á infancia. Seguindo os principios da Convención sobre os Dereitos da Infancia das Nacións Unidas de 1989 e a Carta Fundacional, Tdh - España ten como obxectivo, promover o desenvolvemento da infancia máis desfavorecida, defendendo os seus dereitos, sen discriminación de orde política, racial, confesional e de sexo. Tierra de hombres - España actúa en tres niveis: saúde materno-infantil, protección da infancia e promoción dos dereitos de infancia a través de proxectos de cooperación ao desenvolvemento executados en países de Asia, África e América Latina.
Entre os proxectos de axuda á infancia atópase “Viaxe cara á Vida”, un proxecto que contempla o traslado de nenos e nenas de distintos países africanos afectados de graves patoloxías que precisan dunha tecnoloxía punta da que se carece nos seus países de orixe. Esta necesidade deu lugar ao nacemento, en 1994 en España,e no ano 2003 en Galicia, do proxecto “Viaxe cara á Vida”, que Tierra de hombres leva a cabo grazas á colaboración altruísta de hospitais públicos e privados do noso país, equipos médicos e sanitarios, voluntariado, familias de acollida, empresas e institucións que forman parte dunha gran cadea de solidariedade.
Axuda directa á infancia en www.tierradehombres.org