Exposición. «Indestrutibles». A Coruña
A Sede de Afundación da Coruña acolle do 24 de xullo ao 24 de agosto a exposición fotográfica «Indestrutibles», un proxecto de Alfons Rodríguez e Xavier Aldekoa, patrocinado por Misións Salesianas. A mostra, que ofrece unha mirada de África positiva e realista, estará aberta ao público no número 8 do Cantón Grande.
Exposición con todas as medidas de seguridade pertinentes para que poidas volver gozar da arte e da cultura como o fixeches sempre.
«Indestrutibles» percorre 10 países do continente africano a través da historia de 11 nenos e nenas que nos amosan as súas vidas e as oportunidades en África. Como a pesar das dificultades (pobreza, enfermidades, violencia, desigualdade…), as e os menores africanos miran cara a cara ao mundo con fortaleza e optimismo, con ganas de saír adiante, de vivir e de mellorar. Son as historias de Margaret que, aínda que tivo que casar con 13 anos, loita porque iso non lle pase a ningunha nena máis; a de Joad que traballa durante horas na horta familiar, mais que non deixa de ir á escola porque de maior quere ser doutor; a dos nenos e nenas da rúa de Beira (Mozambique); a da violencia á que se enfrontan menores da República Democrática do Congo; a da fame de Mali… «Pero sempre cunha mensaxe realista e positiva», explican os autores.
En palabras de José Antonio San Martín, director de MISIÓNS SALESIANAS, «é unha oportunidade de descubrir África desde un punto de vista positivo. Por iso, MISIÓNS SALESIANAS quixo traballar xunto aos autores deste proxecto. Temos que empezar a cambiar a imaxe deste continente. Hai fame, violencia, pobreza… mais tamén hai moita mocidade e infancia que se está a preparar para o futuro con esperanza e dignidade».
MISIÓNS SALESIANAS traballa en 51 dos 54 países africanos para mellorar a calidade de vida das poboacións máis vulnerables, sobre todo infancia e mocidade a través da educación. Pero tamén traballa coas persoas refuxiadas, desprazadas pola violencia ou a fame, coas familias sen recursos, polo fortalecemento do papel da muller, por dar acceso á auga ou á saúde… Máis de 1.660 persoas en misións, viven e traballan no continente africano entre quen son máis vulnerables.
Aquí máis información sobre o proxecto expositivo.
