Exposición CONSERVA. Unha Instalación de Jorge Perianes para Cultura por Alimentos, en Vigo
A sala de exposicións do Teatro Afundación de Vigo abre esta mostra de Jorge Perianes, quen se alía co noso proxecto social CULTURA POR ALIMENTOS para propornos unha espectacular instalación concibida e producida para este programa, inspirada na industria conserveira da cidade de Vigo e coa que pretende render homenaxe ás mulleres traballadoras do sector.
Visita inaugural a cargo do artista JORGE PERIANES | 17.30 h | INSCRICIÓNS AQUÍ
Coa colaboración de ANFACO CECOPESCA e FESBAL.
Unha proposta expositiva multidisciplinar articulada arredor dunha espectacular instalación de Jorge Perianes creada ad hoc para esta ocasión. Complementada con elementos gráficos e audiovisuais vinculados co ámbito da industria da conserva e con achegas textuais do propio artista, esta exposición conmemora o primeiro aniversario do programa de impulso social «Cultura por Alimentos».
«Conserva» é unha creación alicerzada no principio de solidariedade e na colaboración, con quen o máis o necesita, mediante a doazón de alimentos non perecedoiros, simbolizados nesta instalación polas latas de conserva. Cunha recreación nun espazo aséptico onde contrasta o brillo dourado das latas.
Coa vocación de propiciar unha exposición con diferentes lecturas e de continuidade alén da propia instalación, o Museo ANFACO-CECOPESCA contribuíu a enriquecer a mostra mediante a achega de material gráfico e audiovisual de arquivo relativo á historia da industria da conserva en Galicia, un ámbito fundamental para o desenvolvemento socioeconómico do país con protagonismo case exclusivo das mulleres nas súas cadeas de produción. Ademais, e co propósito de explicar a xénese e o desenvolvemento da peza central, Jorge Perianes recompila nunha das seccións as lecturas e os debuxos, bosquexos ou traballos preparatorios nos que alicerzou o seu deseño final, que debulla noutra área da mostra cun texto analítico.
Jorge Perianes vive e traballa entre Vigo e Madrid e enfrontouse á creación desta peza coma o seu primeiro traballo importante tras o parón xerado pola pandemia. Nel ofrece unha instalación onde verte as súas reflexións sobre o tempo, o traballo, o espazo industrial, a condición do ser humano e o seu lugar no mundo. Este artista segue sorprendendo polo seu traballo imaxinativo, meticuloso, irónico e narrativo. Igual nas pequenas escalas ca nas grandes instalacións, Perianes establece un xogo de atracción-repulsión que busca provocar na persoa que observa un achegamento confiado a unha obra que oculta, porén, unha forte esencia enigmática e melancólica.
Esta mostra nace ao abeiro de CULTURA POR ALIMENTOS, un ambicioso programa social que Afundación lanzou en setembro 2021 en colaboración con FESBAL, e mediante o cal animamos o público que acode ás nosas actividades a que colabore mediante a doazón de alimentos que destinamos aos Bancos de Alimentos locais.
Entra aquí e infórmate sobre Cultura por Alimentos.
