Exposición GERVASIO SÁNCHEZ. VIDAS MINADAS 25 ANOS, en Pontevedra
No marco da Bienal de Arte de Pontevedra, o Café Moderno Afundación na Praza de San Xosé acolle a impactante exposición 'Vidas minadas. 25 anos', do recoñecido fotoxornalista Gervasio Sánchez. Esta mostra, que se poderá visitar do 21 de xuño ao 30 de agosto, reflicte un cuarto de século de traballo sobre as devastadoras consecuencias das minas antipersoa. A través da súa ollada comprometida e humanista, Sánchez documenta historias de supervivencia, resistencia e dignidade nos países afectados. Unha ocasión única para achegarse ao poder testemuñal da fotografía e reflexionar sobre os efectos da violencia na vida das persoas.
GERVASIO SÁNCHEZ
Gervasio Sánchez (1959, Córdoba) dedicou máis de corenta anos a documentar conflitos armados desde unha perspectiva próxima a quen máis os sofre. O seu traballo como fotoxornalista comezou nos anos oitenta, cando publicou as súas primeiras reportaxes en El Heraldo de Aragón. Desde entón, traballou como autónomo para medios coma a SER, a BBC ou La Vanguardia, cubrindo guerras en América Latina, África, Asia e Europa. Máis alá do momento do disparo, o que lle interesa é o que queda, as consecuencias da violencia, as feridas físicas e emocionais que tardan décadas en pechar, se é que algunha vez o fan. Traballos coma El cerco de Sarajevo (O cerco de Saraievo) ou Vidas minadas reflicten esa mirada comprometida que o acompañou desde o inicio, baseada no respecto ás persoas que retrata e nunha crítica constante á impunidade.
BIENAL DE ARTE DE PONTEVEDRA
Dende a súa creación en 1969 como certame local, a Bienal de Arte de Pontevedra evolucionou ata converterse nun referente internacional da arte contemporánea. O seu crecemento foi especialmente notable nos anos oitenta, e a partir de 1990 consolidou a súa proxección máis alá das nosas fronteiras, afianzando o seu prestixio no panorama artístico nacional e iniciando no 1998 unha nova etapa de expansión internacional, con comisariados de recoñecido prestixio en Europa e unha temática aberta ao diálogo e á reflexión global.
En xuño de 2025, a Bienal regresa tras quince anos, reinventándose coma un grande evento cultural de alcance internacional. Unha cita que celebra a creación artística e promove o debate en torno á cultura contemporánea, reafirmando o seu papel como espazo de encontro e innovación.
Benvidas e benvidos a unha nova etapa da Bienal de Pontevedra.
En colaboración coa Deputación Provincial de Pontevedra.
Aproveita para visitares a axenda web e decatáreste de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte doutras actividades escénicas.
