Estrea da serie dixital: PULP AIR, na Coruña

O 1 de marzo, asiste á estrea da esperada serie dixital Pulp Air, unha comedia en galego producida por Henfunk Studio. Na Sede Afundación A Coruña.

Finalista a Premio de proxecto en galego no festival Carballo Interplay 2021 e realizada coa Subvención a Produción da Axencia de Industrias Culturais, a serie conta as aventuras de Pulp Airlines, a aeroliña galega con máis personalidade de todo o firmamento. Un mockumentary que mostra o día a día desta peculiar compañía tras unha nova fichaxe que chegou para sacudir os seus cimentos.

A comedia, rodada na súa totalidade na provincia da Coruña, conta cun elenco coral estelar que inclúe nomes coma o do cómico Pablo Meixe ou as actrices Isabel Garrido, Lucía Veiga e Mayka Braña.

 

Reserva xa a túa entrada de balde en Ataquilla.com!

E para accederes ao evento, debes doar algún alimento non perecedoiro* a depositares á entrada do edificio, con motivo do noso programa solidario CULTURA POR ALIMENTOS, en colaboración coa Federación Española de Bancos de Alimentos. Grazas pola túa axuda!

*Suxerimos preferiblemente: leite, conservas de peixe ou de legumes.

 

Henfunk Studio é un estudo creativo especializado en produción audiovisual e creatividades para medios dixitais na Coruña.

 

Ficha técnica/artística
• Guión e dirección: Anita Pico
• Produción: Henfunk Studio
• Elenco: Pablo Meixe, Isabel Garrido, Lucía Veiga, Andrea Vilariño, Duarte Galbán, Mayka Braña, Alberto Abal, Javi Tink, Kevin Stewart, Marita Martínez, Tati García
• Dirección Artística: Eva F. Pereira

• Dirección de Fotografía: Iago Vilarinho
• Dirección de Produción: Elena Mansinho
• Deseño de Son: Andrés Caamaño Parga

• Dirección de Posprodución: Ro López

 

Proxecto financiado pola Axencia Galega de Industrias Culturais (AGADIC) e o Instituto da Cinematografía e das Artes Audiovisuais (ICAA).

Colaboran CIFP Escola de Imaxe e Son, AFN Escola de Pilotos, Air Hostess, Centro Sociocultural Ágora, Elías Rumbo, Óptica Selgas, Arte Floral Calo, Yelmo Cinemas, Filamento, Voz audiovisual e La Colmena.