Escolares. TODAS E TODOS CONTAMOS. Actividade itinerante polos centros educativos de Galicia
Actividade itinerante polos Centros educativos de Galicia.
TODAS E TODOS CONTAMOS
Xornada escolar inclusiva con actividades para a arte e a creatividade, impartidas por persoas con diversidade funcional.
INFANTIL, PRIMARIA, 1º e 2º ESO
Nun contexto onde a superación das desigualdades sociais é xustamente a base en que se fundamenta a articulación da economía social, desde Afundación lanzamos este programa presencial para todos os centros de Galicia co que, a través de diferentes actividades culturais, o alumnado participe do valor da diversidade. Esforzo, empatía, aceptación do diferente, reforzo da autoestima ou o respecto son algunhas das ensinanzas presentes na actividade, impartida por persoas con diversidade funcional, mediante as que podemos mellorar a sensibilidade afectiva e emocional, favorecer unha sociedade equitativa, xusta e diversa e facilitar o establecemento de relacións interpersoais. Esta anovadora proposta pon en valor a diversidade como elemento de enriquecemento social e persoal, fomenta a inserción laboral de persoas con diversidade funcional e promove a súa autoestima e confianza ao exercer un rol activo na sociedade.
Contacontos e obradoiro | INFANTIL E 1º PRIMARIA | 3 € escolar
Contacontos LA FAMILIA narrará un conto creado pola Fundación IgualArte, con linguaxe de signos que fala das familias diversas: monoparentais, numerosas, con dous pais, dúas nais, etc. Logo do conto, no obradoiro Creando a miña familia, cada nena e neno creará un bonito móbil colgante coas persoas da súa casa.
Circuíto circense | 2º, 3º E 4º PRIMARIA | 3 € escolar
Nun espazo amplo crearán o seu propio circo. Colocarase un circuíto con diferentes estacións en que o alumnado terá que realizar actividades de equilibrio, puntería e acrosport. Ademais, caracterizaranse de diferentes personaxes con perrucas e outros complementos e realizarán unha pequena representación. As actividades circenses destacan polo seu carácter anovador e motivador. Fomentan valores educativos coma a mellora da convivencia, a cooperación, o aumento da autoestima persoal e grupal, o coñecemento e control do propio corpo e a superación de límites.
Globoflexia | 5º E 6º PRIMARIA | 3 € escolar
O alumnado saberá primeiramente dos principios da globoflexia, para logo practicar esta técnica artística que emprega a torsión como elemento modelador. Comezarán polo básico para conseguiren ao final do obradoiro facer unha gran figura composta. A globoflexia na área educativa permite fomentar a creatividade e a imaxinación para obter formas complexas e orixinais.
Proxección de curtametraxes | 1º E 2º ESO | 3 € escolar
Dúas curtas de temática inclusiva, realizadas pola Fundación IgualArte:
Con lupa. Unha historia cotiá e íntima, construída sobre os xestos e os silencios. Preséntase un abano de olladas que revelan a incomodidade de cada situación descrita, e en cada unha delas subxacen os nosos prexuízos e medos.
Por eso. Narra a historia dunha moza con diversidade funcional que ten a inquedanza de prolongar os seus estudos. Acode a se inscribir nun ciclo medio, porén, cando chega á secretaría do centro educativo, atópase con barreiras inesperadas. Esta curtametraxe trata de reivindicar a igualdade de oportunidades educativas.
Ao remataren as proxeccións, abrirase un pequeno debate sobre as mensaxes e reflexións tiradas das curtas, no que participarán tamén algunhas das actrices ou actores protagonistas. A modo de peche, cada escolar fará un collage sobre a temática tratada.
ESPAZOS Actividades presenciais nos propios centros escolares
CALENDARIO 2º e 3º trimestre do curso escolar
INSCRICIÓNS No 986 120 089 | Pago mediante transferencia bancaria