Entrega Talón Tenda Solidaria - Espazo +60 Viveiro

As socias do Espazo +60 de Viveiro de Afundación, en colaboración coa asociación Familiares Alzheimer (AFA), organizaron un obradoiro solidario cuxos beneficios se destinarán a apoiar a labor da asociación na atención a persoas afectadas por Alzheimer.

O acto de entrega do cheque terá lugar o mércores 4 de marzo ás 17:30 h. no Espazo +60 de Viveiro. No acto estarán presentes, por parte de AFA, representantes da asociación, así como as socias do obradoiro solidario e a coordinadora do centro.

O obradoiro solidario contou coa participación de oito persoas voluntarias, que elaboraron artesanalmente os produtos destinados á venda. A actividade enmárcase dentro do programa «O valor da experiencia» da Área de Envellecemento Activo, que ten como obxectivo potenciar o papel activo das persoas maiores na sociedade e fomentar a participación en actividades de voluntariado.

A xornada incluirá unha charla informativa sobre o Alzheimer, titulada “Que é o Alzheimer, como detectalo e tratamentos”, impartida por Ana Solloso Tiagonce, psicóloga. Posteriormente, procederase á entrega do cheque coa cantidade recadada durante o obradoiro.

Esta iniciativa reflicte o compromiso do Espazo +60 de Viveiro coa participación activa das súas socias e coa colaboración con asociacións locais que traballan pola mellora da calidade de vida das persoas afectadas por enfermidades neurodexenerativas.