Exposición ELISA ABALO: MEDIO SÉCULO DE PINTURA, en Vigo

Se che interesa a arte que fala do humano e do cotián, esta exposición é para ti. A Sede Afundación de Vigo acolle dende o 17 de abril ata o 16 de maio a nova mostra de Elisa Abalo, artista de Portas que leva máis de cincuenta anos retratando todo o que nos rodea dende o primeiro momento da vida: a infancia, os lazos familiares ou a intimidade do fogar.

 

A inauguración de «Elisa Abalo: medio século de pintura» terá lugar o 17 de abril ás 19.00 h e contará coa presenza da propia artista, a crítica de arte Pilar Corredoira e Paloma Vela, coordinadora adxunta da Área de Cultura e Responsable de Exposicións de Afundación. Unha ocasión perfecta para achegarte a coñecela en persoa e escoitar de primeira man as chaves da súa obra.

 

A través dunha selección de obras que percorren medio século de traxectoria, atopámonos cunha ollada honesta e sensible que pon no centro aos máis pequenos, e que explora a inocencia e a vulnerabilidade dos primeiros anos de vida, así como a complexidade dos vínculos. A cor e a luz son as grandes ferramentas de Abalo: con elas transforma o contorno doméstico e cotián nun espazo de reflexión emocional. A selección de obras destaca ademais pola súa capacidade para documentar a intimidade cunha honestidade técnica que reafirma a Elisa Abalo como unha cronista esencial da realidade humana máis próxima.

 

Sen dúbida, esta é unha oportunidade estupenda para descubrir ou reencontrarte cunha das voces máis auténticas da pintura galega contemporánea.