DIVERSA. Mostra Internacional de Ilustración Contemporánea Afundación, en Vigo

A pluralidade como concepto central que nutre estilos, técnicas e perspectivas é a idea da que emerxe DIVERSA, Mostra Internacional de Ilustración Contemporánea Afundación que, despois de pasar pola nosa Sede en Santiago de Compostela, achégase agora a Vigo cunha selección das propostas máis representativas da ilustración actual. A exposición explora como a variedade cultural, a conexión coa nosa contorna e as experiencias persoais das e dos artistas converxen para dar forma a un discurso visual que dialoga cos grandes retos e temas do noso tempo. Convidámoste ao Teatro Afundación Vigo para descubrires unha creatividade fascinante. Do 3 de outubro ao 31 de xaneiro de 2026.

VISITA GUIADA INAUGURAL con Matilde Rodríguez (comisaria)
3 OUT | 19.00 h
¡Apúntate AQUÍ!

Colabora co noso proxecto solidario CULTURA POR ALIMENTOS, traendo unha doazón de produtos non perecedoiros para axudar os bancos de alimentos locais. Infórmate!

Artistas | ADOLFO SERRA (Teruel), ANA JARÉN (Sevilla), ANDREW RAE (Londres), BODIL JANE (Ámsterdam), CATALINA RODRÍGUEZ VILLAZÓN (Asturias), EMILY ELDRIDGE (EE.UU.), HARSA (Zaragoza), INÉS IGLESIAS (Salamanca), INMA HORTAS (Lugo), MARCOS COVELO (Vigo), MARÍA GRANDE (Ourense), MARÍA MEDEM (Sevilla), MARIONA CABASSA (Barcelona), MARITZA BERTOLLINI (México), REBECA LOSADA (Lugo), RICARDO CAVOLO (Salamanca), RUNE FISKER (Dinamarca), SIMON BAILLY (Francia)

Esta exposición reúne unha selección de obras contemporáneas cuxa base creativa é a ilustración, elaboradas con técnicas diversas que abranguen dende o gouache, a colaxe ou a cerámica ata a animación dixital. O fío condutor de todas elas é unha creatividade e unha imaxinación excepcionais, que impulsan a innovación nas linguaxes visuais.

Baixo o concepto central da pluralidade cultural e identitaria, «Diversa» presenta agora en Vigo unha mostra representativa da ilustración actual. Na súa quinta edición, a exposición explora como a diversidade cultural, a conexión coa contorna e as experiencias persoais dos e das artistas converxen para construír un discurso visual que dialoga cos grandes desafíos do noso tempo.

A mostra destaca a coexistencia de múltiples linguaxes visuais dentro da ilustración, integrando tanto técnicas tradicionais como métodos contemporáneos —dende a ilustración dixital ata composicións híbridas—, o que evidencia a capacidade desta arte para reinventarse constantemente a través de novos formatos, materiais e tecnoloxías.

O título «Diversa» reflicte a riqueza temática das obras, que abordan desde cuestións íntimas —como a identidade e os procesos emocionais— ata temas sociais, como a igualdade e a sostibilidade. A exposición eríxese así coma un reflexo da complexidade do mundo actual, promovendo a inclusión e a representatividade a través dun mosaico de personaxes, culturas e contextos vitais.

Ademais, establécese un diálogo coa biodiversidade e a natureza, explorando paralelismos entre o espazo natural e a creatividade humana. As obras reinterpretan a variedade dos ecosistemas, transformando o mundo vexetal, animal e floral en fonte de inspiración e protagonista das creacións.

«Diversa. Mostra Internacional de Ilustración Contemporánea Afundación» consolídase coma un espazo onde conviven tradición e vangarda, ofrecendo unha visión poliédrica da ilustración como ferramenta de expresión e reflexión na arte actual.

DIDÁCTICA

INFANTIL a 4º PRIMARIA | Visita-conto con obradoiro: “Universo Diverso”.
5º PRIMARIA a 2º ESO | Visita-investigación con obradoiro: “Ilustrando un mundo diverso”.
3º ESO, BACHARELATO e C.F. | Visita guiada con obradoiro opcional: “DIVERSA. Mostra Internacional de Ilustración Contemporánea Afundación”.
Prezo | 2 €/participante

Máis información e reservas a través de areaeducativavigo@afundacion.org ou no 986 129 032

Aproveita para visitares a axenda web e decatarte de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para te informares sobre outras actividades escénicas.