Diálogos sobre Lonxevidade e Envellecemento - Coa colaboración de María Carmen Gómez Cabrera e Consuelo Borrás
O exercicio como medicina: movemento, saúde e lonxevidade
Nos últimos anos, a investigación científica demostrou que o exercicio físico actúa como unha poderosa ferramenta para promover un envellecemento máis saudable, influíndo sobre sistemas clave do organismo —como o muscular, o cardiovascular ou o nervioso— e axudando a retardar moitos dos procesos de deterioración asociados á idade.
Neste diálogo, María Carmen Gómez Cabrera e Consuelo Borrás conversarán con Manuel Collado sobre a relación entre actividade física e lonxevidade saudable, para comprender por que o movemento se converteu nun dos grandes aliados da saúde ao longo da vida, abordando algunhas das preguntas máis relevantes da investigación actual:
Que ocorre no noso organismo cando deixamos de movernos? Que nos di hoxe a ciencia sobre a relación entre exercicio e benestar físico e mental? Que mitos seguen existindo sobre a dor, o exercicio físico e a actividade cotiá? Como inflúe o exercicio en aspectos menos visibles como o sono, o estado de ánimo ou a saúde cerebral? Pode o adestramento de forza converterse nunha ferramenta esencial para preservar a autonomía e a calidade de vida? Pode o exercicio transformar o funcionamento dos nosos músculos e articulacións mesmo anos despois de levar unha vida sedentaria?
María Carmen Gómez Cabrera é catedrática de Fisioloxía na Universidade de Valencia e investigadora no Instituto de Investigación Sanitaria (INCLIVA), onde dirixe un grupo de investigación centrado na bioloxía do músculo esquelético, o metabolismo e a fisioloxía do exercicio. O seu traballo estuda os mecanismos moleculares implicados no envellecemento muscular, a sarcopenia e a fraxilidade, así como o impacto do exercicio físico sobre a saúde e a lonxevidade. Liderou proxectos nacionais e internacionais, colabora co National Institute on Aging e forma parte do comité de dirección do CIBERFES. Así mesmo, desenvolve unha intensa actividade editorial en revistas científicas especializadas en envellecemento e bioloxía redox.
Consuelo Borrás é catedrática de Fisioloxía na Universidade de Valencia e desenvolve a súa investigación no campo do envellecemento desde hai máis de dúas décadas. Os seus traballos céntranse nas bases biolóxicas do envellecemento e no deseño de estratexias de intervención orientadas a promover un envellecemento saudable, incluíndo exercicio físico, nutrición e medicina rexenerativa. Dirixiu e participou en numerosos proxectos nacionais e internacionais e conta con máis de 150 publicacións científicas en revistas de alto impacto. Formou parte de distintas sociedades científicas nacionais e internacionais vinculadas á xeriatría, á xerontoloxía e ao estrés oxidativo, e é autora do libro 100 años no es nada.
Dr. Manuel Collado é investigador científico do Centro Nacional de Biotecnoloxía (CSIC) e dirixe o seu grupo no CiMUS da Universidade de Santiago de Compostela. Centrou o seu traballo no estudo da senescencia celular, o seu papel no cancro e na identificación de compostos capaces de eliminar selectivamente as células senescentes que poderían empregarse na terapia do cancro e do envellecemento.
DIÁLOGOS SOBRE LONXEVIDADE E ENVELLECEMENTO
Un ciclo divulgativo e científico no que da man de expertos e expertas abordaremos de maneira accesible e amena, tanto diferentes aspectos da investigación científica que nos axuden a entender mellor o envellecemento desde unha perspectiva multidimensional, como os factores cotiáns e sociais que inflúen en como vivimos e envellecemos, sobre os que podemos incidir dunha maneira directa.
DIÁLOGOS ANTERIORES
Accede ao primeiro diálogo: "É posible reverter o envellecemento? Pode ser o futuro da saúde?" Cos doutores Manuel Serrano e Manuel Collado
Accede ao segundo diálogo:: "Que papel xoga o sistema inmunitario no envellecemento saudable? Podemos reforzar as nosas defensas inmunitarias para envellecer con máis saúde?" Cos doutores María Mittelbrunn e Manuel Collado
Accede ao terceiro diálogo: "Pode a ciencia descubrir por que e como envellecemos? Servirá iso para ter un envellecemento máis saudable?" Cos doutores Myriam Gorospe e Manuel Collado.
Accede ao cuarto diálogo: "Cando o cerebro envellece: retos e esperanzas" Coas doutoras Ana María Cuervo e Isabel Fariñas.
Accede al quinto diálogo: "Envejecer con sentido: propósito, reconocimiento y resiliencia" Con la filósofa y profesora Anja Machielse y la dra. Sara Marsillas