Conferencia: "Hackers do cerebro: como as drogas alteran os nosos circuítos neuronais", por Lucía Hipólito, en Ourense

Nesta charla do noso ciclo EDUCACIÓN S. XXI, Lucía Hipólito explorará o fenómeno da adicción da man de datos científicos. Analizará as súas fases, como se manifesta no comportamento e afondará nos mecanismos cerebrais que a sosteñen. "Hackers do Cerebro: Como as drogas alteran os nosos circuítos neuronais" revelaranos os factores de vulnerabilidade e protección, incluíndo o papel do sexo/xénero como variable destacada na predisposición e progresión da adicción. Explicaranos cales son as opcións actuais de tratamento e como poderían evolucionar no futuro. A prevención é a mellor fórmula, e por iso achegamos este encontro para toda a comunidade educativa e público xeral, o 23 de abril na Sede Afundación Ourense. 

 

Reserva entrada gratuíta en Ataquilla.com (prazas limitadas)

 

Coñeces CULTURA POR ALIMENTOS? Con este programa solidario convidámoste a asistires á charla con algúns produtos non perecedoiros para axudar os Bancos de Alimentos locais. Infórmate.

 

LUCÍA HIPÓLITO

Doutora en Farmacia pola Universitat de València, é profesora titular na Facultade de Farmacia. A súa actividade investigadora céntrase no campo da neurofarmacoloxía da adicción, en entender o efecto do alcol no cerebro e os factores de risco para sufrir alcoholismo, coa finalidade de atopar novas terapias para esta adicción. Publicou numerosos artigos científicos en revistas de impacto e traballou en diversos laboratorios en universidades de prestixio como a Universidade de Cambridge (Reino Unido) e a Universidade de Columbia (EUA), nas que estudou a adicción e a dor. Como resultado das súas investigacións recibiu premios da Sociedade Europea de Investigación no Alcoholismo (ESBRA), da Fundación Valenciana de Estudos da Dor (FUNDOLOR) e de Talento Novo Investigador outorgado por Bankia e Levante-EMV. Actualmente, desenvolve a súa investigación no Laboratorio Doreal da Universitat de València, onde estuda, entre outros, a dor como factor de risco no alcoholismo e en trastornos psicolóxicos de tipo ansiedade, especialmente no sexo feminino. 

 

CICLO EDUCACIÓN S. XXI

Un programa de conferencias para dar a coñecer as últimas tendencias, estudos e teorías sobre Educación a toda a comunidade escolar, desde as familias ao propio estudantado e, por suposto, ao equipo docente. Grandes especialistas xa pasaron polos nosos edificios nas distintas cidades galegas, ofrecendo o seu enfoque profesional para apoiar a educación desde a casa e desde a escola.

 

Aproveita para visitar a axenda web e decátate de todas as propostas culturais que che ofrecemos ao longo do mes. Tamén podes entrar na nosa ticketeira Ataquilla.com para informarte sobre outras actividades escénicas.