Conferencia "IA e Saúde Mental: Aliada ou Ameaza para a adolescencia?" con Pere Castellvi Obiols, na Coruña

A Sede Afundación A Coruña trae o primeiro encontro deste 2026 para a comunidade educativa co catalán Pere Castellvi. Dentro do ciclo EDUCACIÓN S. XXI, o especialista vén falar sobre vantaxes e inconvenientes da IA usada como apoio á saúde mental na adolescencia. Unha guía moi interesante a ter en conta para saber como manexarse coas novas tecnoloxías á hora de buscar apoio psicolóxico.

 

Esta conferencia encádrase no programa solidario Cultura por Alimentos. A túa doazón de produtos non perecedoiros irá destinada aos bancos de alimentos locais.
Máis información

 

A intelixencia artificial (IA) está a transformar rapidamente a forma en que entendemos e tratamos a saúde mental. Este cambio trae consigo oportunidades extraordinarias: diagnósticos máis precisos, tratamentos personalizados, acceso a apoio psicolóxico en calquera momento, e redución do desbordamento en servizos de saúde mental. Con todo, xunto a estas promesas, emerxen desafíos éticos fundamentais que nos afectan a todas as persoas. Que ocorre cando adolescentes establecen vínculos de dependencia emocional con máquinas que simulan empatía e parecen entendernos? Como protexemos os nosos datos máis íntimos mentres as máquinas aprenden dos nosos patróns mentais? Quen é responsable se a IA fomenta condutas inapropiadas e que poden empeorar a nosa saúde mental?

 

Pere Castellvi Obiols é profesor agregado do Departamento de Psicoloxía Clínica e da Saúde da Universitat Autònoma de Barcelona, Doutor en psicoloxía e Máster en psicopatoloxía e Máster en saúde pública. A súa liña de investigación é na promoción do benestar mental e da prevención do suicidio entre a mocidade. Nos últimos anos especializouse na aplicación e as repercusións da intelixencia artificial na saúde mental desde un punto de vista ético.

 

CICLO EDUCACIÓN S. XXI

Un programa de conferencias para dar a coñecer as últimas tendencias, estudos e teorías sobre educación a toda a comunidade escolar e ao público xeral. Grandes especialistas xa pasaron polos nosos edificios. Se tes interese en visualizar estes contidos, bota un ollo en Afundacion.tv

 

Non perdas nada da nosa programación consultando a axenda. E para máis espectáculos, agardámoste en Ataquilla.com