Voces Conectadas: 8 diálogos entre mozos e maiores para conmemorar o Día Europeo da Solidariedade Interxeracional

Con motivo do Día Europeo da Solidariedade Interxeracional, Afundación, a Obra Social de ABANCA, organiza o vindeiro 29 de abril oito coloquios simultáneos en toda Galicia. Baixo o lema "Voces Conectadas", reuniremos máis de 150 persoas —membros dos nosos Espazos +60, estudantes, profesores e persoal de Afundación— para compartir perspectivas, temas de valor, tecnoloxías, temas de traballo, temas de interese, etc. e os acontecementos que marcan cada xeración.

Oito encontros, oito olladas

Cada cidade abordará un tema diferente:

• Betanzos e Pontedeume: A tecnoloxía únenos ou afástanos?

• Ferrol: Xuventude e vellez: mitos e realidades

• Lugo: Que acontecementos marcaron a cada xeración?

• Monforte: Música e cine: iconas de todas as épocas

• Pontevedra: Solidariedade interxeracional entre as mulleres

• Santiago: Como imaxinamos o futuro dende as distintas xeracións?

• Vigo: Independizarse onte e hoxe

• Viveiro: Os nosos valores cambiaron co paso do tempo?

Dende 2015, Afundación súmase cada ano a esta conmemoración como parte da súa aposta por fomentar as relacións e o diálogo entre as distintas xeracións. Segundo o Informe Mundial de Idadismo da OMS, isto é fundamental para combater o idadismo e o discurso divisivo e construír unha sociedade para todas as idades.

Nos nosos Espazos +60, con máis de 13.000 socios, promovemos proxectos innovadores que poñen en valor as experiencias vitais das persoas maiores e fomentan a súa participación social a través do voluntariado. Ademais, programas como "Fálame da emigración" e "Falamos da escola" xa conectaron a preto de 6.000 mozos e 157 maiores en encontros de aprendizaxe mutua.

Hoxe, máis ca nunca, celebramos o poder de escoitar e aprender uns dos outros. Porque cada xeración precisa das outras para seguir a avanzar.

Manifesto polo Día Europeo da Solidariedade Interxeracional.